Naihatid na sa Laguna Provincial Jail sa Sta. Cruz, Laguna ang pugante na si Verjust Dizon matapos itong sumuko sa hepe ng Sta. Maria, Bulacan na si PSupt Raniel Valones kahapon ng hapon.
Nagtago sa Brgy. Turo Bocaue, Bulacan si Dizon pagkatapos na makatakas sa Laguna Provincial Jail noong Linggo ng umaga kasama ng lima pang pugante.
Nagtitiwala umano si Dizon kay Supt. Valones kaya mas pinili nito na dito sumuko. Nais din ni Dizon na linisin ang kaniyang pangalan na hindi siya ang bumaril sa jail guard nang sila ay tumakas.
Sa ngayon, tatlo na lang ang pinaghahanap ng mga otoridad matapos maaresto ang dalawang pugante nuong Martes sa Imus, Cavite.
Ang mga pinaghahanap pa na mga tumakas na bilanggo ay sina Rayman Raymundo, Rio Mahilom at Teddy Bucal.
( Sherwin Culubong / UNTV Correspondent )
Patuloy na pinaghahanap ng Bulacan PNP at mga tauhan ng Bulacan Provincial Jail ang labindalawa sa dalawamput tatlong mga children in conflict with the law o mga menor de edad na nagkasala sa batas na tumakas mula sa Bahay Tanglaw Pagasa Youth Rehabilitation Center sa Malolos Bulacan noong Lunes ng gabi.
Una ng naibalik kahapon sa reformation center ang labing isa sa mga ito matapos ang isinagawang manhunt operation ng mga otoridad.
Ayon sa DSWD, sinira ng mga ito ang rehas ng bintana sa cr, pagkatapos ay kumuha na ng kumot na pinagtali-tali upang makababa mula sa ikalawang palapag ng building. Posible anila na ang paghihigpit sa patakaran ng rehabilitation center ang dahilan kung bakit tumakas ang mga kabataan.
Ayon sa DSWD, nakikipagtulungan naman sa kanila ang ilang mga magulang ng mga tumakas na kabataan upang maibalik ang mga ito sa rehab center.
Iniimbestigahan naman nila kung may naging pagkukulang ang dalawang jail guard na nakaduty noong mangyari ang insidente.
Sa tala ng DSWD isandaan at tatlumput anim na menor de edad na may mga kaso gaya ng paggamit ng ipinagbabawal na gamot, rape at pagnanakaw ang nasa kustodiya ng Tanglaw Pag-asa Youth Rehabilitation Center.
(Nestor Torres / UNTV Correspondent)
Tags: Bulacan PNP, DSWD, Manhunt operation
