Pinayagang ipagamit ni Artenio Marges, isang board member ng Agrarian Reform Beneficiary Organization (ARBO) ang 1,000 metro kuwadradong lote upang gawing urban vegetable farming project sa ilalim ng Department of Agrarian Reform (DAR) na pinakinabangan naman ng 55 miyembrong magsasaka sa Naic, Cavite.

Tinawag na “Buhay sa Gulay” ang bagong proyektong ito at may layuning maka-ambag sa suplay ng pagkain sa mga residente ng lugar, isulong ang kahalagahan ng pagsasaka, at bigyan ng pagkakataon ang mga residente na magkaroon ng alternatibong pinagkukunan ng sariwang gulay.

Samantala, ang maaaning gulay tulad ng pechay, Chinese kangkong, at mustasa ay ibebenta sa kooperatiba kung saan 5% ang kikitain ng kooperatiba at ang tirang benta ay idadagdag naman sa kita ng mga mga myembrong magsasaka ng proyekto.

Ayon kay Provincial Agrarian Reform Program Officer II James Arthur T. Dubongco, inaasahang ang iba pang urban areas sa Cavite ay magpatupad rin ng ganitong proyekto upang lalong makita ang kahalagahan ng pagsasaka sa mga komunidad.

Pinasalamat din ni Dubongco ang limang siyentistang magsasaka sa Cavite na kusang-loob na nagbahagi ng kanilang mga kaalaman tungkol pagsasaka upang matulungan ang proyektong urban vegetable farming ng mga magsasaka.

(Evangelyn Alvarez | La Verdad Correspondent)