DAVAO CITY, Philippines – Umakyat na sa 14 ang kumpirmadong nasawi sa nangyaring 2 makakasunod na malalakas na lindol nitong Linggo lamang sa ilang bahagi ng Mindanao.
Samantala, umabot na rin sa mahigit 400 ang nasugatan at karamihan dito ay nadaganan ng mga gumuhong debri. Isang hotel din ang gumuho sa bahagi ng Kidapawan City kasunod ng nangyaring malakas na pagyanig.
Buti na lamang at hindi na ipinagamit ang nasabing hotel mula pa noong unang nangyaring malakas na lindol noong October 16 kung kaya’t walang nasaktan sa nasabing pagguho.
Nananawagan naman ng tulong ang mga lokal na pamahalaan sa mga kalapit bayan at probinsya lalo na sa mga hindi apektado ng lindol na mabigyan sana sila ng karagdang ayuda upang maituloy tuloy nila ang tulong na maibigay sa mga apektadong residente. Pangunahin dito ang foodpacks, tubig at mga tarapal na pwedeng gawing tent sa mga evacuation sites.
(Janice Ingente | UNTV News)
Tags: casualties, earthquake
METRO MANILA – Pinawi ng Philippine Institute of Volcanology and Seismology (PhiVolcs) ang pangambang gagalaw ang fault line ng Pilipinas kasunod ng malakas na lindol sa Taiwan.
Ayon sa PhiVolcs, hindi konektado sa mga faultline ng Pilipinas ang nangyaring lindol, at kung magkakaroon man ng lindol sa bansa ay hindi dahil sa 7.5 Taiwan quake.
Ayon kay Phivolcs Director Teresito Bacolcol, hindi rin mararamdaman ang pagyanig ng 7.4 magnitude na lindol ng Taiwan sa Northern Luzon.
Ang tanging maaaring maging banta lamang nito ay ang tsunami.
Tags: earthquake, PHIVOLCS, Taiwan
METRO MANILA – Walang naiulat na nasaktan o nasawi sa magnitude 6.8 lindol, na tumama sa Morocco nitong Biyernes September 8.
Sa isang panayam, sinabi ni Department of Migrant Workers Officer in Charge Hans Leo Cacdac, na wala pa silang natatanggap na report ng mga Pilipinong nasaktan sa nangyaring lindol doon.
Gayunman patuloy anila silang naka-monitor sa sitwasyon.
Pinayuhan naman ng Philippine Embassy sa Morocco ang mga Pilipino na manatiling kalmado, pero maging alerto sa mga posibleng epekto ng nangyaring lindol sa naturang bansa.
Umabot na sa mahigit 2,000 ang nasawi sa bansa dahil sa malakas ng pagyanig.
Tags: DMW, earthquake, Morocco
METRO MANILA – Umakyat na sa 2,509 na indibidwal ang nasawi sa magnitude 7.8 na lindol na tumama sa Turkey at Syria.
Sa nasabing bilang 1,541 dito ay mula sa Turkey. Ayon kay Turkey Vice President Fuat Oktay mayroong 9,733 katao ang sugatan.
Sa Syria naman ay nasa 968 ang nasawi kung saan 538 ay mula sa government-controlled areas habang 430 naman ay mula sa opposition-controlled areas.
Inaasahan ng mga otoridad na madagdagan pa ang bilang ng mga nasawi dahil patuloy ang ginagawa nilang paghahanap sa mga lugar kung saan gumuho ang maraming mga gusali.
Samantala sa isang tweet, sinabi ni Pangulong Ferdinand Marcos Jr. na nakahanda ang Pilipinas na magpaabot ang anomang tulong sa Turkey at Syria.
Sa ngayon ay patuloy na nakikipagugnayan ang Department of Foreign Affairs sa Filipino communities upang malaman kung may mga Pinoy na naapektuhan ng malakas na lindol sa 2 bansa.
Tags: earthquake, Syria, Turkey
