METRO MANILA – Isinailalim ni Manila City Mayor Francisco ‘Isko Moreno’ Domagoso nitong Martes (March 9), ang dalawang barangay at ilang mga hotel sa 4 na araw na lockdown dahil sa pagtaas ng bilang ng kaso ng COVID-19.
Pinirmahan ng alkalde ang Executive Order No. 06 na naglalayong mas paigitingin pa ang contact tracing, disease surveillance at COVID Testing bilang responde sa pagkalat ng virus sa Barangay 351 at 725.
Magsisimula ang lockdown ngayong Huwebes, March 11 – 12:01 ngmadaling araw hanggang sa Linggo, March 14, 11:59 ng gabi.
Ayon sa datos ng Manila Health Department, umabot na sa 12 kasong active cases ang naitala sa Barangay 351 at 14 na active cases naman sa Barangay 725.
Kaugnay nito, isasailalim din sa lockdown ang 2 hotel sa Barangay 699 na nakapagtala ng 17 active cases. 14 dito ay mula sa Malate Bayview Mansion at 3 naman sa Hop Inn Hotel.
Inirekomenda din ng MHD na ideklara at isailalim ang mga nasabing barangay sa “Critical Zones” na kung saan ay Enhance Community Quarantine (ECQ) guidelines ang paiiralin.
Ayon kay Domagoso, ang mga residente ng mga nasabing barangay ay mananatili sa kanilang mga tahanan at hindi maaaring lumabas.
Papayagan lamang ang mga health workers, military personnel, service, utility workers, essential workers, mga barangay at mga media personnel na accredited ng Presidential Communications Operations Office at Inter-Agency Task Force.
Sa datos ng MHD, mayroong 154 na active cases ang naidagdag kahapon (March 9) at pumalo na sa 988 na aktibong kaso ang naitatala ng lungsod.
Kaugnay nito ay 74 na ang mga gumaling at 2 ang namatay ngayong araw. Sa kabuuan, 27,639 na ang naitalang gumaling at 817 dito ang nasawi.
(Jasper Barangan | La Verdad Correspondent)
METRO MANILA – Ipinaliwanag ni Pangulong Rodrigo Duterte Kagabi (March 22) kung bakit hindi nagpatupad ang pamahalaan ng malawakang lockdown sa gitna ng nakababahalang Covid surge sa bansa.
Ayon sa punong ehekutibo, pinsala ang idudulot ng muling pagsasara ng ekonomiya.
“So kung sarahan mo naman ‘yan lahat– medyo tagilid na ang ekonomiya, that’s a problem. It would be a disaster for our country. Kung sarahan mo talaga lahat. It would be a disaster for the country” ani Pangulong Rodrigo Duterte.
Ginawa ng pangulo ang pahayag matapos nitong aprubahan ang National Capital Region plus bubble kung saan inilagay sa mas mahigpit na General Community Quarantine ang Metro Manila at 4 na kalapit lalawigan partikular na ang Laguna, Cavite, Rizal at Bulacan mula March 22 hanggang April 4.
Iginiit ng pangulo na kailangang balansehin ang sitwasyon sa pamamagitan ng limitasyon sa paggalaw ng mga tao.
“Not so many are being affected, hindi afflicted in the sense that your movements are being curtailed. The curtailment of your free to travel is always subject to the power of the state to control the movement of its citizens especially if there is pandemic. The state has that kind of power, although hindi yan sa martial law, it’s just putting you at the right places at the right time at this time,” ani Pangulong Rodrigo Duterte.
Bawal ang non-essential travel papunta at palabas ng NCR plus bubble.
Authorized persons outside residence lang ang maaaring pumasok at lumabas.
Bukod sa travel restrictions, bawal din ang gatherings kabilang na ang religious gatherings.
Outdoor dining lang din ang pinapayagan sa mga restaurant ngunit hanggang 50% capacity lamang.
(Rosalie Coz | UNTV News)
Tags: lockdown
METRO MANILA – Ipagbabawal ng pamahalaang lungsod ng Maynila ang mga tradisyong Katoliko sa Semana Santa mula Marso 28 hanggang Abril 4 ngayong taon dahil sa banta ng Coronavirus Disease 2019 (COVID-19).
Sa ilalim ng Executive Order No. 9 na nilagdaan ni Manila Mayor Francisco “Isko Moreno” Domagoso, mahigpit na ipinagbabawal ang pabasa, senakulo, Visita Iglesia, prusisyon at iba pang mga pagtitipon sa darating na holiday season.
Alinsunod sa mga regulasyon ng Inter-Agency Task Force on Emerging Infectious Diseases (IATF) ay ipatutupad din ang liquor ban, curfew hours, physical distancing at pagsusuot ng face mask at face shield.
Humingi naman ng paumanhin ang alkalde at nagbigay ng payo sa mga residente ng naturamg lungsod.
“Magnilay-nilay po tayo sa ating sari-sariling mga tahanan. Magdasal po tayo kasama ang ating pamilya, at humingi ng awa sa Diyos na matapos na sana ang pandemyang ito,” ang pahayag ni Mayor Isko Moreno Domagoso.
(Rhuss Egano | La Verdad Correspondent)
Tags: long holiday, Maynila
MANILA, PHILIPPINES – Inutusan ni Manila City Mayor Francisco ‘Isko Moreno’ Domagoso ang lahat ng mga LGU sa Manila na higpitan ang isinasagawang health and security measures dahil sa patuloy na pagtaas ng kaso ng COVID-19 sa nasabing lungsod.
Ayon sa opisyal, kailangan higpitan ang pagpapatupad ng minimum health protocols sa mga barangay at kalsada sa Maynila upang matigil ang pagtaas ng bilang ng kaso ng naturang sakit.
Binibigyan pahintulot ni Mayor Domagoso si Manila Barangay Bureau (MBB) Director Romy Bagay na magsagawa ng Barangay-level lockdowns sa mga lugar na may tumataas na bilang ng COVID-19 cases.
Pinaalahanan din ni Mayor Domagoso ang publiko, na sa kabila ng paghihigpit, ay dapat may galang parin sa mga Batang Maynila ang mga kasapi ng Manila Police District (MPD). Kasama din sa mga tutulong sa MPD na magmonitor sa mga protocols ang daan-daang COVID-19 safety marshals na idedeploy ng Manila Traffic and Parking Bureau (MTPB).
Kasama din sa hakbang ng LGUs sa Maynila kontra COVID-19 ay ang pagbibigay pagkain para sa 700,000 na pamilya, libreng pagbabakuna para sa gov’t healthcare workers at mass swab testing na sagot ng LGU.
(Jacobsen Aquino | La Verdad Correspondent)
