METRO MANILA –  Pinapupunuan ni Budget Secretary Benjamin Diokno ang aabot sa 264 libong bakanteng posisyon sa pamahalaan. Sa bilang na ito, pinakamarami ang teaching at teaching-related positions na aabot sa 125,000.

“Allow me to personally invite all qualified persons to apply for positions in the government. Your country needs you,” paanyaya ni Secretary Diokno sa mga naghahanap ng trabaho.

Hindi rin aniya magiging epektibo ang pagganap ng tungkulin ng mga ahensya ng pamahalaan kung hindi mapupunuan ang mga naturang bakanteng posisyon.

Magpapalabas naman ng circular ang Department of Budget and Management (DBM) upang atasan ang mga ahensya ng pamahalaan na punuan ang mga bakanteng posisyon. Kung hindi ito mapupunuan pagkatapos ng limang taon mula nang likhain ang naturang mga posisyon ay maaaring i-abolish na ito.

Dagdag pa ni Sec. Diokno, “It’s really hard to attract applicants right now because of our salary adjustments. The salaries in government are now fairly attractive. So, to those who want to join the government, we can compete with the private sector.”

Para naman sa taong 2019, nasa 25,000 ang bagong posisyon na pinaglaanan na ng pondo ng pamahalaan para sa mga bagong guro, pulis, bumbero at jail officers.

Kaugnay nito, magsasagawa naman ng ‘Jobs, Jobs, Jobs Caravan’ ang pamahalaan para sa mga infrastructure-job-related openings sa ika-12 ng Agosto.

Ulat ni Rosalie Coz/UNTV News

Larawan mula sa PVI