Bumulagta ang driver ng tricycle at tumilapon sa tabing kalsada ang dalawang pasahero nito matapos banggain ng taxi sa itaas ng Buendia flyover sa Roxas Boulevard bandang ala una kaninang umaga.
Kinilala ang driver ng tricycle na si Elmer Carreon, 41 years old, at ang mga pasahero nitong sina Rafael Javonillo, 64 years old, at Josefina Ocampo, 58 years old.
Ayon sa Pasay Traffic Enforcer, mabilis ang takbo ng taxi driver kahit na pataas ng flyover kung kaya’t nabundol nito ang tricycle. Nagtamo ng malubhang sugat sa ulo ang tricycle driver na sumalpok sa windshield ng taxi habang mayroong posibleng bali sa paa ng isa sa mga pasahero.
Agad na dinala sa ospital ang mga biktima habang mabilis namang naglakad papalayo at tumakas ang driver ng Jim and Joie taxi.
Iniimbestigahan pa ang insidente habang patuloy pang pinaghahanap ang taxi driver.
(Asher Cadapan Jr. / UNTV Correspondent)
