Nagsasagawa na ng parallel investigation ang mga otoridad upang matukoy ang suspek at ang motibo ng pananambang kay Ozamiz City RTC Branch 15 Exec. Judge Edmundo Pintac.

Si Judge Pintac ay tinambangan ng apat na suspek na sakay ng dalawang motorsiklo kahapon, 4:20 ng hapon sa purok 2B Brgy. Banadero, Ozamis City malapit sa entrance gate ng Naomi’s Botanical Garden.

Ayon kay Misamis Occidental Provincial Director PSsupt. Manny Hebron, si Judge Pintac ay nagtamo ng mga tama ng bala ng 45 baril sa iba’t-ibang bahagi ng katawan nang tambangan ng mga suspek habang lulan ng itim na Hyundai Sta. Fe na may plakang POR 620 sa nasabing lugar.

Si Judge Pintac ang may hawak sa kasong illegal possession of firearms at illegal drugs ng magkapatid na sina Ozamiz Vice Mayor Nova Princess Parojinog at Reynaldo Parojinog Jr.

Ito rin ang nagbasura ng petisyon ng magkapatid na bumisita sa burol ng kanilang mga kaanak na napatay sa madugong raid noong Hulyo 2017.

Tags: Judge Edmundo Pintac, Ozamis City RTC Branch 15, Reynaldo Parojinog Jr