Patuloy na binabantayan ng Philippine Institute of Volcanology and Seismology o PHILVOCS ang sitwasyon ng Mt. Kanlaon matapos ang dalawang beses na pagbuga ng abo na may kasamang bato kagabi.
Sa monitoring ng PHILVOCS, dakong ala-sais bente kagabi nang mangyari ang ash explosion na may sukat na 1,500 meters mula sa crater nito,na tumagal ng halos labing dalawang minuto.
Pasado alas siete nang muling maitala ang mahinang pagsabog mula sa bulkan na tumagal ng halos 25 segundo lamang.
Kabilang sa mga lugar na naapektuhan ng pagbuga ng abo ang Sitio Guintubdan, Barangay Ara-Al, at La Carlota, Negros Island.
Ayon kay PHILVOCS Director Renato Solidum, posibleng masundan o maulit pa ang naturang ash eruption, kaya’t mahalaga pa rin na sundin ng mga residente at ng lokal na pamahalaan ang 4 kilometer radius permanent danger zone.
Nagbabala rin ang PHILVOCS hinggil sa masamang epekto na maaring idulot ng mga abong malalanghap na ibinubuga ng bulkan.
Inabisuhan na rin ng PHILVOCS ang mga airline company na iwasan muna ang paglipad ng mga eroplano malapit sa bulkan.
Sa kasalukyan ay nanatili sa alert level one ang Bulkang Kanlaon.
Nangangahulugan ito na hindi normal ang activity at may nakikita ang PHILVOCS na pamamaga ng Mt. Kanlaon, sensyales na anumang oras ay maari magkaroon ng pagsabog.
Sa ngayon ay tuloy-tuloy ang 24/7 monitoring ng PHILVOCS sa Mt. Kanlaon at wala pa namang ipinatutupad na evacuation order sa mga residente.
(Joan Nano / UNTV Correspondent)
Tags: Ash eruption, Mt. Kanlaon, PHILVOCS
METRO MANILA – Itinaas sa alert level 2 o increasing unrest ng Philippine Institute of Volcanology and Seismology (PhiVolcs) ang Kanlaon volcano matapos ang pagsabog nito kagabi, June 3.
Naglabas ng nasa 5,000 metrong taas ng plume o usok ang bulkan.
Ayon sa ulat ng PhiVolcs, tumagal ng anim na minuto ang pagsabog nito.
Pinapayuhan naman ang publiko na iwasang pumunta sa 4 kilometer-radius permanent danger zone upang makaiwas sa posibleng pagsabog, rockfall at landslide.
Tags: Mt. Kanlaon, PHIVOLCS
Matapos na itaas ng Philippine Institute of Volcanology and Seismology o PHILVOCS sa alert level 4 kahapon ang banta ng Bulkang Mayon, lalo pang pinag-igting ng PHILVOCS ang kanilang pagbabantay sa aktibidad ng bulkan.
Ayon sa kanila, ano mang oras mula ngayon ay malaki ang posibilidad na tuluyan nang sumabog ang Bulkang Mayon. Dalawang beses na nagpakawala kahapon ng makakapal na abo ang Mount Mayon.
Unang naitala ng PHILVOCS ang pagbuga ng ash column, alas dose trenta y kwatro ng hapon at ang ikalawa naman ay dakong alas kwatro ng hapon. Naitala rin ang ilang mahihinang pagputok ng bulkan o ang tinatawag anilang vulcanian eruption.
Dahil sa mas tumitinding pang pag-aalburuto ng bulkan, itinaas na ng PHILVOCS sa alert level 4 ang banta ng Mt. Mayon. Sa ganitong estado, lubha anilang delikado ang pyroclastic materials na ibinubuga ng bulkan.
Agad na pinalikas ng lokal na pamahalaan ang nga residenteng nakatira maging sa 8 kilometer radius extended danger zone.
Dagdag pa ng PHILVOCS, kung dati ay ang mga lugar lamang na nasa South Area ng bulkan ang lubhang apektado ng posibleng pagsabog, ngayon maging ang mga nasa North East Section o ang nga bayan ng Tabacco, Sto.Domingo at Legazpi City ay pinalilikas na rin.
Paliwanag pa ng PHILVOCS, dahil nakataas na ang alert level 4, nangangahulugan ito na malaki ang posibilidad na tuluyang sumabog na ang bulkan.
Sa ngayon, sinuspinde na muli ni Albay Provincial Governor Al Franchis Bichara ang klase sa lahat ng antas sa buong lalawigan at pinapayuhan ang lahat na magsuot ng face mask. Kung maari, iwasan munang lumabas ng kani-kanilang mga bahay.
( Joan Nano / UNTV Correspondent )
Tags: Bulkang Mayon, PHILVOCS, vulcanian eruption
Mahigpit na binabantayan ngayon ng Negros Occidental Provincial Disaster Risk Reduction and Management Council ang aktibidad ng Buklang Kanlaon matapos itong ilagay ng DOST-PHIVOLCS sa alert level 2.
Ibig sabihin, nasa moderate level of unrest ang bulkan at posibleng magbuga ito ng magma or magmatic eruption anomang oras.
Kaya mahigpit na ipinagbabawal sa mga tao ang pumasok sa 4 kilometrer radius permanent danger zone dahil sa posibleng pagbuga ng bulkan ng lava. Ipinagbabawal din ng Civil Aviation Authority ang paglipad ng eroplano malapit sa bulkan.
Nagsagawa na ng emergency response committee meeting for Mt. Kanlaon ang Disaster Management Program Division. Nakahanda na rin ang contigency plan at evacuation center sakaling pumutok ang bulkan.
Tiniyak naman ni Negros Occidental Governor Alfredo Maranon na bente kuwatro oras na babantayan ng mga otoridad ang bulkan upang agad maalerto ang mga residente.
Noong Biyernes, sinuspindi ng DepEd ang pasok sa elementary at high school sa bayan ng La Castellana dahil sa mabahong amoy ng sulfur.
Matatandaan noong Marso nakaraang taon pumutok ng mahigit sampung minuto ang naturang bulkan at bumuga ng mga bola ng apoy ngunit wala namang naitalang nasawi.
Pinapayuhan ng lokal na pamahalaan ang mga residente malapit sa bulkan na maging mahinahon at sumunod lagi sa abisong kanilang inilalabas upang maiwasan ang mga sakuna.
( Lalaine Moreno / UNTV Correspondent )
Tags: alert level 2, DOST-PHIVOLCS, Mt. Kanlaon
