Itinuturing ng pambansang pulisya na seryoso ang balitang planong pagpapatalsik sa pwesto kay Pangulong Rodrigo Duterte sa Oktubre. Patuloy na biniberipika ng PNP ang impormasyong ito na sinabi ng Pangulo.
Batay sa pahayag ng Pangulo, nasa likod ng planong pagpapatalsik sa kaniya si sina Senator Antonio Trillanes IV, ang Liberal Party (LP) at ang Communist Party of the Philippines (CPP).
Una nang itinanggi ni Trillanes ang akusasyon; gayundin si Vice President Leni Robredo na siyang tumatayong chairperson ng LP.
Para naman kay DND Sec. Delfin Lorenzana, tsismis lang ang balitang mga dismayadong militar ang nagpaplanong patalsikin ang Pangulo sa susunod na buwan.
Sa halip, ang CPP-NPA aniya ang may planong tanggaling ang Pangulo sa pwesto noon pang 2016.
Tiniyak naman ni PNP chief, Director General Oscar Albayalde na nananatiling tapat sa konstitusyon at sa chain of command ang pambansang pulisya kayat walang dahilan para isailalim sa loyalty check ang mga pulis.
Sinabi pa ni Albayalde na walang nakikita ang PNP na paglabag ng Pangulo sa konstitusyon kayat walang dahilan para kontrahin at iwan nila ang punong ehekutibo.
Gayunman, nagbanta pa din ang heneral na kakasuhan ang sino mang aktibong pulis na makikisawsaw sa pulitika.
Una nang sinabi ni Sen. Antonio Trillanes IV na mayroon nang mga sundalo at pulis na dismayado sa pamumuno ng Pangulo.
( Lea Ylagan / UNTV Correspondent )
Tags: CPP, Director General Oscar Albayalde, LP
Nagdeklara ng unilateral ceasefire ang Communist Party of the Philippines (CPP).
Epektibo ang idineklarang unilateral ceasefire, alas dose uno ng hatinggabi sa ika-24 hanggang ika-26 ng Disyembre at alas dose uno ng hatinggabi sa ika-31 ng Disyembre hanggang ika-1 ng Enero.
Batay sa pahayag ng CPP, sa panahon na umiiral ang ceasfire, lahat ng unit ng New People’s Army (NPA) ay hindi magsasagawa ng opensiba laban sa mga tauhan ng Armed Forces of the Philippines (AFP) at Philippine National Police (PNP).
Subalit nanindigan si Defense Secretary Delfin Lorenzana na hindi magdedeklara ng tigil-putukan laban sa mga komunista ang pamahalaan.
Tags: AFP, CPP, unilteral ceasefire
Isang panibagong babala ang binitiwan ni Pangulong Rodrigo Duterte kahapon laban sa New People’s Army (NPA).
Ayon sa punong ehekutibo, handa siyang utusan ang militar at pulisya na gawin kung ano ang kailangan upang pigilan ang mga planong paghahasik ng kaguluhan ng mga makakaliwang grupo.
Hindi naman malinaw kung ang tinutukoy ng pangulo ay ang nangyari sa Sagay City, Negros Occidental kung siyam na magsasaka ng tubo ang pinaslang ang itinuturo responsable dito ang New People’s Army (NPA).
Ayon sa Pangulo, gagawin niya ang lahat upang mapanatili ang kaayusan sa bansa.
Nanawagan din ito sa publiko na huwag sundin ang mga makakaliwang grupo.
Kaugnay sa nangyaring Sagay massacre, ayon sa Sandatahang Lakas ng Pilipinas, bahagi umano ito ng plano ng Communist Party of the Philippines (CPP) at NPA para ipahiya ang administrasyong Duterte sa international community.
( Rosalie Coz / UNTV Correspondent )
Tags: CPP, NPA, Pangulong Duterte
Ngayon na ang ika-4 na araw ng filing ng certificate of candidacy (COC) para sa mga tatakbo bilang senador sa 2019 midterm elections. Unang dumating ngayong araw ang dating senador at stalwart ng Liberal Party (LP) na si Mar Roxas.
Ayon sa kaniya, hindi madali ang kaniyang naging desisyon na bumalik sa pulitika mula sa pribadong buhay. Sumunod rin na naghain ang kapartido ni Roxas na sina Senator Bam Aquino, Human Rights Lawyer-Attorney Jose Manuel Diokno at former Congressman Erin Tañada.
Tututukan naman ni Tañada ang problema sa kahirapan at ang kaniyang adbokasiya na pagtulong sa mga mahihirap na magsasaka. Kilala si Tañada bilang si Mr. FOI dahil sa pagsusulong ng freedom of information.
Naghain rin ng kaniyang COC si Taguig City Representative Pia Cayetano. Kilala rin siya bilang health at environment advocate ang dati na ring naging senador.
Kasama naman ni Ilocos Norte Governor Imee Marcos ang kaniyang kapatid na dating Senator Bongbong Marcos sa paghahain ng COC. Naniniwala si Imee na kayang harapin ngayon ng pamilya Marcos ang mga hamon at kritisismo sa kanila.
Si dating Senator Jinggoy Estrada, kasama ang amang si Manila Mayor Joseph Estrada. Hindi naniniwala si Jinggoy na magkakaroon sila ng hatian ng boto ng kaniyang kapatid na si JV Ejercito.
Ipinakilala naman ng Katipunan Party ang kanilang 13 senatorial slate. Pinangungunahan naman ito ng dating Consultative Committee Spokesman Ding Generoso.
Hindi naman nagpahuli ang iba pa nating kababayan na nais ring tumakbo bilang senador. Iba-iba ang kanilang plano para sa bansa at mga nais magawa kapag naupo na sila bilang mga mambabatas.
( Nel Maribojoc / UNTV Correspondent )
