Nasa mahigit 260 ang taunang joint military exercises na ginagawa ng AFP at US Armed Forces.
Pero binawasan na ito kaya naging 258 at sa nasabing bilang kasama pa rin ang maliliit na military drill na nilalahukan ng maliit na bilang ng mga sundalo.
Una nang inalis ang dalawang malaking annual military exercise na Amphibious Landing Exercise o PHIBLEX at Cooperation Afloat Readiness and Training o CARAT.
Ang dalawang naval exercise na ito ay kinapapalooban ng territorial defense trainings.
Ngunit ayon kay AFP Spokesman Brigadier General Restituto Padilla, asahang mababawasan pa ang nasabing listahan ng military exercises, maliban sa balikatan exercises na nilalahukan ng nasa isang libong sundalo mula sa AFP at ng US.
Ngunit ang magiging sentro na lamang nito ay sa pagresponde sa mga kalamidad, sakuna at paglaban sa terorismo.
Ayon naman kay AFP Chief of Staff General Ricardo Visaya, nirerespeto ng kanilang counterpart ang direktiba ni Pangulong Rodrigo Duterte na bawasan na ang military exercises.
Ang pagpupulong ng working group ng AFP at US Armed Forces ay gagawin sa Disyembre ngayong taon at Enero ng 2017.
(Bryan De Paz / UNTV Correspondent)
Tags: AFP, Binawasang military drill ng Pilipinas at Amerika
