Blogger Drew Olivar at PCOO Asec. Uson, humingi ng paumanhin kaugnay ng video hinggil sa deaf community

by Radyo La Verdad | September 20, 2018 (Thursday) | 2227

Marami ang hindi natuwa sa lumabas na video nina PCOO Assistant Secretary Mocha Uson at blogger radio host na si Drew Olivar.

Dito makikitang ilang segundong gumagamit ng sign language ang blogger at radio host at maririnig na bahagyang nagtatawanan ang dalawa.

Sa ilalim ng Republic Act 7277 na inamyendahan ng Republic Act 9442 o Magna Carta for Disabled persons, nakasaad na walang sinomang indibidwal, grupo o komunidad ang maaaring kumutya sa persons with disabilities (PWD). Maging sa pamamagitan ng pagsulat o salita na maaaring ikababa ng kanilang self-esteem.

May kaukulan itong parusa na multang mula 50 hanggang 100 libong piso at pagkakakulong ng anim na buwan hanggang dalawang taon para sa unang paglabag.

Multang 100 hanggang 200 libong piso at pagkakakulong ng 2 hanggang 6 na taon naman ang parusa sa mga susunod na paglabag.

Ngunit kahit anila wala namang intensyong masama ay humingi ng tawad ang dalawa kaugnay ng lumalabas na video.

Ngunit para kay Maria Anaditha Angcay, marami sa mga deaf people at hearing supporters ang nasaktan sa diskrimasyon at panunuyang ito na nanggaling pa mismo sa isang opisyal ng gobyerno.

Tanggap niya ang paghingi ng tawad nina Drew at Asec. Mocha, pero hindi niya alam kung paano sila patatawarin o matatanggap ito ng buong komunidad.

 

( Mai Bermudez / UNTV Correspondent )

Tags: , ,