Not guilty – ito ang inihaing plea ni dating Agusan del Sur Rep. Rodolfo Plaza sa pagbabasa sa kanya ng sakdal sa Sandiganbayan 2nd Division ngayon myerkules.
Si Plaza ang isa sa mga kongresistang nakasuhan sa Anti Graft Court dahil sa PDAF Scam.
Mahigit 42.1 million pesos na Priority Development Assistance Fund o PDAF ang inendorso umano ng dating kongresista sa mga pekeng ngo’s ni Janet Lim Napoles.
Sa pagbabasa ng sakdal, itinanggi ni Plaza ang mga paratang at sinabing hindi siya guilty sa limang kaso ng graft, limang kaso ng malversation at dalawang kaso ng direct bribery.
Maliban kay Plaza, not guilty plea rin ang inihain ng kanyang kapwa akusado na si Janet Lim Napoles pati na rin sina Mario Relampagos, Rosario Nunez, Lalaine Paule at Marilou Bare mula sa Department of Budget and Management at ilang opisyal ng implementing agencies na sina Gondolina Amata, Gregorio Buenaventura, Chiya Jalandoni, Sofia Cruz at Ofelia Ordonez.
Bagaman dalawampu’t tatlo ang akusado sa PDAF Scam case na ito, hindi lahat ay nabasahan ng sakdal dahil ang ilan ay at large pa. (Joyce Balancio/UNTV News)
Hindi umano mag-aaksaya ng panahon si dating Senador Juan Ponce Enrile sa apela ni Cagayan Governor Manuel Mamba sa Ombudsman na ipakansela ang kaniyang piyansa sa kasong plunder.
Sa sulat kay Ombudsman Samuel Martires, sinabi ni Mamba na nagsinungaling sa korte si Enrile tungkol sa kalusugan. Patunay umano ang pagnanais nitong makabalik sa Senado at hindi malubha ang kalusugan nito, taliwas sa sinasabi ng korte kaya ito pinayagang magpyansa at pansamantalang makalaya.
Pero ayon kay Enrile, galit lang sa kanya si Mamba kaya naman nais nitong maibalik siya sa kulungan. Katwiran pa ng dating senador, sa ilalim ng batas ay ipinagpapalagay siyang inosente hanggat hindi siya nahahatulang may-sala ng korte.
Iginiit pa nito na ang korte lamang ang may kapangyarihang magbalik sa kanya sa kulungan.
Sinabi pa ni Enrile na hanggang ngayon ay walang konkretong ebidensiya sa akusasyong nakinabang siya sa bilyong pisong pork barrel scam.
Nitong nakalipas na linggo, naghain ng certificate of candidacy (COC) si Enrile upang tumakbong senador sa 2019 midterm elections.
Naghain din ng kandidatura sina dating Senador Bong Revilla at Jinggoy Estrada na akusado rin sa mga kasong plunder kaugnay ng PDAF scam.
( Charlie Barredo / UNTV Correspondent )
Tags: Ex-Sen. Enrile, PDAF scam, piyansa
METRO MANILA – Kinasuhan na rin ng gobyerno ng Estados Unidos si Janet Napoles, ang itinuturing mastermind ng bilyun-bilyong pisong pork barrel scam.
Ayon sa US Department of Justice, sinampahan ng conspiracy to commit money laundering, domestic money laundering at international money laundering si Napoles. Damay rin sa kaso ang mga anak nitong sina Jo Christine, James Christopher at Jeane Catherine; ang kaniyang mga kapatid na sina Reynald Luy Lim at Ana Marie Lim.
Tinatayang nasa $20-M na pera mula sa Priority Development Assistance Fund (PDAF) ng mga mambabatas ang ipinasok at inilabas ni Napoles sa Estados Unidos. Ginamit niya umano ito sa personal na gastusin ng kaniyang pamilya, sa pagbili ng bahay at lupa, at mamahaling mga sasakyan kabilang na ang $12.5-M na real state sa Southern California.
Makikipag-ugnayan din ang mga otoridad ng Estados Unidos sa pamahalaan ng Pilipinas upang ma-extradite si Napoles at ang limang kaanak nito upang mapanagot sila sa isinampang mga kaso.
Tags: Estados Unidos, extradite, extradition, Janet Napoles, kaso, PDAF scam, United States
Magpapatuloy ang paglilitis ng mga kasong plunder at katiwalian ni dating Senador Jinggoy Estrada kaugnay ng pagkakasangkot nito sa pork barrel scam.
Sa botong 6-4, pinagtibay ng Korte Suprema ang resolusyon ng Office of the Ombudsman na nagsasabing may sapat na batayan upang litisin sa Sandiganbayan ang dating senador.
Tumanggi muna ang kampo ni Estrada na magbigay ng pahayag hinggil sa isyu dahil hindi pa umano nila natatanggap ang kopya ng resolusyon.
Matatandaang Abril noong 2014 umapela sa Korte Suprema si Estrada at hiniling na baliktarin ang resolusyon ng Ombudsman.
Nanindigan ito na biktima siya ng selective justice at political persecution bilang dating miyembro ng opposition sa panahon ng Aquino administration.
Batay sa kasong isinampa ng Ombudsman, tumanggap si Estrada ng 183 milyong piso na kickback mula sa kanyang Priority Development Assistance Fund (PDAF).
Setyembre 2017 pinayagan naman ng Sandiganbayan na magpiyansa ang dating senador dahil mahina umano ang ebidensiya laban dito.
Bukod kay Estrada, kinasuhan din ng Ombudsman sina dating Senador Juan Ponce Enrile at Ramon Bong Revilla Jr.
( Mai Bermudez / UNTV Correspondent )
Tags: Korte Suprema, Ombudsman, PDAF scam
