Hindi nakaligtas sa alagad ng batas ang isang dating pulis matapos umanong manlaban sa buy-bust operation sa St. Jude Subdivision, Barangay Malinta, Valenzuela City pasado alas nuebe kagabi.
Ang suspek na si PO2 Exequiel Sangko ay nagretiro na noong 2015 at nakatalaga noon sa Valenzuela Police .
Ayon sa surveillance ng PDEA sa suspek, nagtutulak umano ito ng iligal na droga habang namamasada ng tricycle.
Nakaramdam umano ang suspek na alagad ng batas ang kaniyang ka-transaksyon kaya ito nanlaban kaya napilitang gumanti ng putok ang PDEA agent.
Hindi na umabot ng buhay ang suspek nang dalhin ito sa Dalandanan Emergency Hospital.
Kasama sa national drugs watch list ni Pangulong Rodrigo Duterte si PO2 Sangko.
Ayon kay Police Senior Supt. David Poklay na hepe ng Valenzuela PNP, maliban sa pagtutulak ng droga sangkot din ito sa pangongotong.
Narekober kay Sangko ang 30 grams ng hinihinalang shabu na nagkakahalaga ng mahigit dalawang daan libong piso at isang 9mm na baril.
( Reynante Ponte / UNTV Correspondent )
METRO MANILA – Itinanggi ng Philippine Drug Enforcement Agency (PDEA) na nasa kanilang drug watchlist si Pangulong. Ferdinand Marcos Jr.
Kasunod ito ng talumpati ni dating Pangulong Rodrigo Duterte na umano’y nakita nya noon sa listahan drug personalities ng PDEA si PBBM.
Ayon kay PDEA Spokesperson Derick Carreon, hindi kailanman napasama ang pangulo sa kanilang drug watchlist.
Dagdag pa nito, simula noong i-activate ang kanilang National Drug Information System noong July 30, 2002 ay hindi lumutang ang pangalan ni Pang. Marcos Jr.
Sinabi pa nito na maging noong panahon ng administrasyong Duterte ay wala din umano ito sa tinatawag nilang Inter-Agency Drug Information database.
Tiniyak naman ng PDEA na kahit na nasa ilalim sila ng Office of the President, ipatutupad nila ang rule of law.
Tags: drug watchlist, PBBM, pdea
Nagtuturuan ang dalawang kabataang sa Quezon City kung sino ang may-ari ng kaha ng sigarilyo na naglalaman ng hinihinalang shabu nang maaresto sila sa buy bust operation ng Quezon City Police District Station 3 sa tapat ng isang fast food chain sa Barangay Culiat sa Quezon City, alas nuebe y medya kagabi.
Ayon sa PNP, nakabili umano ng shabu ang kanilang operatiba sa isa sa mga suspek na si Yassher Logan, pero itinanggi naman ito ni Yassher. Sinabi niya na inaya lang daw siyang sumama ng kaibigan niyang si Julhamin Isla. Sagot naman ni Isla, inaya lang din daw siya ni Yassher na bibili sa fastfood chain.
Narekober sa mga suspek ang sampung gramo ng hinihinalang shabu na nagkakahalaga ng animnapung libong piso.
Samantala, tatlo naman ang naaresto sa buy bust operation ng QCPD Station 7 sa Donya Soledad Avenue Extension, Barangay Don Bosco, Paranaque City.
Unang nagtransaksyon ang mga suspek at ang nagpanggap na buyer sa Cubao sa Quezon City pero nagbago umano ang isip ng mga suspek at nag-aya sa isang mall sa Paranaque.
Kinilala ang mga suspek na sina Herna Tammyang alyas “Ayang”, ang lider ng grupo, Fatma Saabdulama alyas “Fat” at Hassan Taman alyas “Nur”.
Narekober sa mga suspek ang apat na sachet ng hinihinalang shabu na naglalaman ng 200 gramo na street value na 1.36 milyong piso, dalawang pirasong 1,000 pisong bill buy bust money, dalawang cellphone at 150 piraso ng budol money.
( Gerry Galicia / UNTV Correspondent )
Agad na inaresto ng Quezon City Police District (QCPD) Station 7 ang mag-live in partner na sina Melchor Guadiz at Olga Macabangon nang makabili ng limang daang pisong halaga ng shabu sa kanila ang pulis na nagpanggap ng buyer sa Barangay Soccoro, Quezon City alas otso kagabi.
Ayon sa QCPD, matagal na nilang minamanman ang dalawa na umanoy supplier ng droga sa ilang lugar sa Cubao.
Nang kapkapan ang suspek, nakuha sa mga bulsa nito ang dalawang cellphone, dalawang coin purse na naglalaman ng labing pitong sachet ng hinihinalang shabu at limang daang pisong marked money. Sa kabila nito, todo tanggi pa rin ang mga suspek.
Ayon sa PNP, nakulong na si Melchor Guadiz sa kasong robbery-hold up at nakalaya noong taong 2016.
Sa ngayon, patuloy pa ang ginagawang pagtugis ng PNP sa supplier ng mga suspek na taga-Cavite.
( Gerry Galicia / UNTV Correspondent )
Tags: buy bust operation, droga, QCPD
