Nauwi sa isang madugong engkwentro at kamatayan ng isang lalaking tulak umano ng droga ang isinagawang buy bust operation ng mga pulis sa Maypajo, Caloocan kaninang madaling araw.
Sa inisyal na ulat ng Northern Police District Drug Enforcement Unit, alas-dose diyes ng madaling araw nang puntahan ng kanilang mga operatiba ang suspek na si Winner Gatdula, 40 anyos sa bahay nito sa tabi ng riles upang arestuhin.
Ngunit nang makatunog umano ito sa isinasagawang entrapment operations ay bumunot ito ng baril. Narekober mula sa suspek bilang ebidensya ang isang 45 kalibre na baril, walong selyadong plastik ng suspected shabu at drug paraphernalia.
Ayon naman sa ilang residente, marami pa ring kasama ni Gatdula ang nagtutulak at gumagamit sa kanilang lugar.
(Bernard Dadis / UNTV Correspondent)
Tags: Caloocan city, drug pusher, patay
MANILA, Philippines – Kinumpirma ni National Capital Region Police Office (NCRPO) Chief Police Major General Guillermo Eleazar na si Guia Gomez Castro ang tinaguriang Drug Queen ng Maynila.
Dating tumakbong Councilor ng Maynila si Castro noong 2016 ngunit hindi pinalad na manalo.
Ngunit tumakbo siyang barangay chairperson noong nakaraang Barangay at SK elections at nanalo.
Ayon kay Eleazar, si Castro ang binabagsakan ng droga ng Ninja Cops upang muling maibenta.
“In the case of the Drug Queen, who is an open secret when we arrested her first cousin na si permentera April of this year pati na din ang asawa nya na si ivy rose na naconvict na, e talagang siya ang itinuturo kaya sa ngayon ay banggitin natin siya Guia Gomez Castro”. ani NCRPO Director, Police Major General Guillermo Eleazar .
Ayon kay Eleazar hindi umano nakapanumpa sa posisyon si Castro dahil umalis ito ng bansa bunsod ng matinding kampanya ng pamahalaan laban sa iligal na droga.
Bumalik umano ito ng Pilipinas sakay ng Philippine Airlines Flight 119 noong September 18, 2019 mula Vancouver, Canada. Subalit noong September 21, 2019 ay nagtungo ito ng Bangkok Thailand.
Kaya naman, hamon ni Eleazar kay Castro, bumalik ito ng bansa at harapin ang alegasyon laban sa kanya.
Ayon kay Eleazar sa ngayon ay ang unang kagawad ng barangay 484 na si Antonio Calma ang tumatayong chairperson sa lugar.
Samantala sa diagram ng NCRPO, 16 na Ninja Cops ang konektado umano sa Drug Queen subalit wala na ang mga ito sa serbisyo.
(Lea Ylagan | UNTV News)
Tags: drug pusher, Maynila, NCRPO
MANILA, Philippines – Posibleng simulan na ng Department of Transportation (DOTR) ang pagpapatakbo ng mga tren sa linya ng MRT-7 sa taong 2021.
Ayon kay Transportation Undersecretary for Railways Timothy John Batan target nilang buksan sa susunod na 2 taon ang partial operability o biyahe ng MRT-7 mula North Avenue station sa Quezon City hanggang sa Sacred Heart sa Caloocan City.
Personal na ininspeksyon kahapon (July 17) ng mga opisyal ng DOTR ang constuction site ng MRT-7 kasama ang kinatawan ng San Miguel Corportation na siyang contractor ng proyekto.
Sa kasalukuyan mahigit 44% nang tapos ang MRT-7. Nakapaloob dito ang konstruksyon ng mga istasyon, platform at linyang paglalatagan ng riles ng tren.
Nakumpleto na rin ang pagbili ng 36 na bagong train sets mula sa South Korea. Maging ang matagal nang problema sa kontruksyon ng depot ay naresolba na rin ayon sa DOTR.
“Our concessionaire already has proposed a solution and secretary tugade already approved the solution and give us a few weeks we were just implementing it kapag ready na kami we will announce it but malaking malaki po yung matitipid natin na oras in terms of implementation once this solution is in place” ani DOTR Railways, Usec.Timothy John Batan.
Ang MRT-7 ay isang 23 kilometer railway system mula North Avenue sa Quezon City hanggang San Jose Del Monte Bulacan.
Binubuo ito ng 14 na istasyon ang North Avenue, Quezon City Memorial Circle, University Avenue, Tandang Sora, Don Antonio, Batasan, Manggahan, Dona Carmen, Regalado, Mindanao Avenue, Quirino, Sacred Heart, Tala at San Jose Del Monte Bulacan.
Ang kumpletong linya ng MRT-7 ay inaasahang matatapos sa 2022.
Sa oras na matapos, ang dating 4 na oras na biyahe mula Quezon City hanggang San Jose Del Monte Bulacan, aabutin na lamang anila ng 34 na minuto. Kaya nitong makapagsakay ng aabot sa halos 500,000 pasahero kada araw.
Samantala, tiniyak naman ng DOTR na hindi matutulad ang serbisyo ng MRT-7 sa mga aberya at problema sa linya ng MRT-3.
Ayon kay Usec.Batan mayroon na silang maigting na pakikipagugnayan sa mga pribadong sektor na katuwang ng pamahalaan na mangangasiwa sa pagtatakbo ng MRT-7. Bahagi rin ng kanilang kontrata ang pagpapataw ng multa sa pribadong sektor kung bigo ang mga ito na maiayos ang serbisyo ng mga tren.
“May mga performance indicators po tayo at kapag hindi po yan nafulfill ng ating concessionaire meron din po yang corresponding financial penalties so we’re expecting that to add to the assurances na mapapatakbo ng maayos ang linya kapag natapos in 2021-2022” ani DOTR Railways, Usec.Timothy John Batan.
Samantala 30% na ring tapos ang itinatayong common station sa may North Avenue na magdurugtong sa linya ng LRT-1, MRT-3 at MRT-7. Sa pagtaya ng DOTR inaasahang matatapos na ito sa susunod na taon.
(Joan Nano | Untv News)
Tags: Caloocan city, DOTr, MRT-7, North Avenue
CALOOCAN, Philippines – Isinugod agad sa ospital ang 7 lalaki kabilang ang isang menor de edad matapos ang umano’y pamamaril ng isang aktibong pulis sa Barangay 28, Bagong Barrio, Caloocan City noong Lunes ng kagabi.
Kusa namang sumuko ang suspek na si PO1 Danilo Tiempo, isang police rider na nakatalaga sa Navotas Police Station simula pa noong 2011.
Sa inisyal na impormasyon ng mga awtoridad, nagkaroon ng komosyon sa lugar malapit sa bahay ng suspek na sangkot ang kapatid nito na si Roland Tiempo. Nang humingi ng tulong ang kapatid nito ay humantong sa pagpapaputok ng baril ng suspek.
Nagtamo ng minor injuries ang lima sa mga biktima na agad ding nakalabas ng ospital habang under observation pa ang dalawa sa mga ito kabilang ang isang menor de edad dahil sa tama ng bala sa braso at likod.
Na-recover ng mga pulis ang tig-isang basyo ng 9mm at kalibre .45 na baril. Aminado naman ang suspek na pagmamay-ari nito ang mga baril ngunit itinangging may kinalaman ang kapatid niya sa insidente.
Self-defense umano ang kaniyang ginawa dahil sa pagsugod ng grupo sa kanilang bahay.
Ani PO1 Tiempo, “Sinugod po nila ‘yung father ko, grupo po sila, ‘yung mga adik po sa amin. ‘Yung father ko po tumakbo sa bahay. Nakita ko ‘yung father ko duguan, nag-react na po ako. Kaya gusto ko lumabas sa bahay. ‘Yung pagpunta ko po doon, nakita ko po ‘yung mga grupo. Susugurin po ako kaya kailangan ko rin po protektahan ‘yung sarili ko. Pinutukan ko sila sa baba para hindi po nila ako masugod.”
Nasa kustodiya na ng Northern Police District si PO1 Tiempo habang patuloy pang iniimbestigahan ng mga otoridad ang insidente.
(Asher Cadapan Jr. | UNTV News)
Tags: Caloocan city, po1 danilo tiempo, police, police caloocan
