Matapos makapagsagawa ng pag-aaral si interior Secretary Eduardo Año kaugnay ng social impact ng e-sabong o online cockfighting, nagdesisyon na si Pangulong Rodrigo Duterte na ipahinto ang operasyon nito sa bansa epektibo ito ngayong araw, May 3, 2022.
Binanggit ito ng Punong Ehekutibo sa kaniyang recorded public address kaninang umaga.
Ayon sa Pangulo, may nakararating na ulat sa kaniya kaugnay ng matinding epekto ng sugal sa mga pamilya matapos magsagawa ng survey si Sec. Año sa social impact ng e-sabong.
“The recommendation of Secretary Año is to do away with e-sabong. He cited the validation report coming from all sources. So, it’s his recommendation and I agree with it and it’s a good. So e-sabong will end by tonight,” pahayag ni Pang. Rodrigo Duterte.
Kaya aprubado na aniya ang rekomendasyon ni Sec. Año na itigil na ang e-sabong operations.
“May naririnig ako, loud and very clear to me, it was working against our values, and ‘yung impact sa pamilya, pati sa tao, eh ang labas hindi na natutulog yung mga sabungero 24 hours,” dagdag ni Pang. Duterte.
Sinabi ng Presidente na daan-daang milyong halaga ng buwis para sa gobyerno ang habol ng kaniyang administrasyon kaya pinahintulutan niya ang operasyon nito.
Rosalie Coz | UNTV News
Tags: E-SABONG, Eduardo Año, Pang. Rodrigo Duterte
METRO MANILA – Naglabas ng kautusan si Pangulong Ferdinand Marcos Jr. ukol sa patuloy na pagpapatigil ng operasyon ng e-sabong sa bansa.
sa ilalim ng Executive Order number 9, binigyang diin ng pangulo ang pangangailangan ng patuloy na suspensyon ng e-sabong.
Inaatasan din ang lahat ng kinauukulang ahensya na hulihin at ipasara ang naturang ilegal na operasyon.
Sasakupin ng suspensyon ang lahat ng online or remote, streamed o broadcast live na mga sabong.
Binigyang diin ni Pangulong Marcos Junior na may obligasyon ang estado na protektahan ang pampublikong kalusugan at moral, isulong ang public safety at general welfare.
May 3, 2022 nang unang iniutos ni Dating Pangulong Rodrigo Duterte ang pagpapatigil ng online cockfighting operations o e-sabong sa bansa.
METRO MANILA – Batid ni Pangulong Rodrigo Duterte ang masamang epekto ng E-sabong operations sa mga pamilya.
Kaya naman humingi ito ng tawad sa publiko dahil sa pagpapahintulot nito sa bansa.
Ayon sa punong ehekutibo, nanghinayang siya sa kikitaing buwis ng pamahalaan.
Ginawa nito ang pahayag ng pangunahan ang inspeksyon sa National Academy of Sports sa New Clark City sa Capas, Tarlac kahapon (June 14).
Subalit ayon sa pangulo, napagtanto niya ang masamang epekto ng bisyo sa mga Pilipino.
“Kaya ‘yun ang naano ko, but I realized very late and I am very sorry that it had to happen. Hindi ko akalain na ganoon, hindi naman ako nagsusugal. I do not gamble, I do not drink anymore, only water. Pag na-dysfunctional, sige away. Maghiwalay ‘yan.” ani Pangulong Rodrigo Duterte.
Nitong nakalipas na buwan, iniutos ng presidente na agarang ipatigil ang e-sabong operations sa bansa.
Ito ay matapos magsagawa ng pag-aaral ang pamahalaan kaugnay ng negatibong social epekto ng sugal. Kabilang na ang pagkakalulong ng ilang naglalaro na nagreresulta pa sa pagbebenta ng kanilang mga anak.
(Rosalie Coz | UNTV News)
Tags: E-SABONG, Pangulong Duterte
Pinaboran ng Pang. Rodrigo Duterte si National Task Force to End Local Communist Armed Conflict (NTF-ELCAC) Spokesperson Lorraine Badoy sa pag-red tag sa ilang partylist organization sa recorded Talk to the People ng Pangulo kagabi (March 30).
“Ang problema they are supporting or they are really parang legal fronts ng communist party of the Philippines itong ulitin ko, Kabataan, Anakpawis, Bayan Muna, Alyansa of Concerned Teachers (ACT), and Gabriela,” pahayag ni Pang. Rodrigo Duterte sa kanyang Talk to the People.
Nanawagan rin ang Pangulo na huwag iboto ang mga naturang partylist groups.
Mariin namang tinutulan ng mga miyembro ng Makabayan bloc ang red tagging na ito ng Pangulo.
“Feeling namin nagpa-panic na ang kasalukuyang administrasyon dahil lumalakas ang oposisyon,” ayon kay Rep. Arlene Brosas, Gabriela partylist.
“Mali at mapanganib ang red tagging, tumitindi ang atake sa oposisyon lalo na ngayong eleksyon,” pahayag ni Rep. Sarah Jane Elago, Kabataan partylist.
Ayon naman kay Bayan Muna partylist Representative Carlos Zarate, taktika rin ito ng administrasyon para lumihis sa mga isyung kinakaharap ng bansa tulad ng problema sa pandemya at patuloy na pagtaas ng presyo ng produktong petrolyo.
“Itong red tagging na ito ay act of desperation in fact with tactic din para ilihis ang mamamayan sa tunay na isyu,” ani Rep. Carlos Zarate, Bayan Muna partylist.
Inamin naman ni ACT teachers partylist representative France Castro na nagdudulot ng takot sa kanilang mga tagasuporta ang pagsasabing konektado sila o legal front sila ng komunistang grupo.
“So nagkakaroon ito ng takot sa aming constituents basically mga potential voters namin ‘yan,” sinabi ni Rep. France Castro, Act-Teachers partylist.
Giit ng mga mambabatas, hindi na bago ang isyung ito at wala umanong matibay na basehan ang red tagging ng administrasyon.
Nel Maribojoc | UNTV News
