Simula na ngayong taon sa Ontario ang isang health privilege para sa mga naninirahan na ang edad ay 24 pababa.

Libre na silang makakakuha ng mga prescription drugs sa ilalim ng OHIP+: Children and Youth Pharmacare program ng estado.

Aabot sa mahigit apat na libo na iba’t-ibang klase ng gamot ang maaaring ma-avail ng mga kabataan gaya ng asthma inhalers, anti-depressants, insulin, kahit ang mga gamot sa epilepsy at cancer.

Malaking pakinabang ang programang ito sa mga pamilyang nabibilang sa low-income earners dahil kung dati ay kailangan pa nilang bumili ng private insurance, ngayon ay libre na silang makakakuha ng mga gamot na kailangan nila.

Noong nakaraang taon ay nasa 5.2% ng mga Canadians ang walang drug insurance at ngayong naipatupad na ang programang ito, umaasa ang gobyerno ng Canada na bababa ito sa 1.8%.

Ang privilege na ito ay automatic sa mga bata at kabataan basta may OHIP card at valid prescription.

( Kim Pamintuan / UNTV Correspondent )

Tags: libreng prescription, OHIP+, Ontario