Patay ang isang dating miyembro ng Philippine Marines matapos itong pagbabarilin ng hindi pa nakikilalang suspek sa IBP Road sa Quezon City, alas dies y medya kagabi.

Kinilala ang biktimang si Elmer Paulino, 39 anyos, tricycle driver na natanggal sa pagiging miyembro ng marines dahil sa absence without leave o AWOL.

Sa inisyal na imbestigasyon ng mga otoridad, pasakay na sana ng kaniyang tricycle si Paulino nang lapitan ng isang lalaki na nakasuot ng face mask at malapitang binaril.

Pagkatapos magawa ng suspek ang krimen ay naglakad na lang ito sa isang eskinita. Nagtamo si Paulino ng tama sa ulo at dibdib.

Ayon sa asawa nito, gusto nang bumalik sa serbisyo ni Paulino at noong nakaraan buwan aniya ay nagpunta ng Camp Aguinaldo ang biktima para lakarin ang kaniyang pagbabalik-serbisyo.

Inamin din nito na dati ng gumamit ng iligal na droga ang kaniyang asawa. Giit din niya na walang kaaway ang kaniyang asawa.

Sa ngayon, patuloy ang imbestigasyon ng pulisya ang motibo sa pamamaslang.

( Reynante Ponte / UNTV Correspondent )

Tags: Ex-Philippine Marine, patay, Quezon City