METRO MANILA – Nababahala ang Food and Drug Administration (FDA) sa paglaganap ng kalakalan ng mga umano’y hindi rehistradong gamot laban sa COVID-19.
Paliwanag ni FDA Director General Undersecretary Eric Domingo, hindi maaring pagkatiwalaan ang mga gamot ng hindi dumaan sa tamang proseso.
Dahil maaaring lalo pa itong makasama sa kalusugan.
“Mayroon kaming nilalabas na warning sa ating mga kababayan kasi ngayon lalo na yung mga gamot para sa COVID-19 na mga in-demand, marami po talaga ang nagbebenta. Mayroong online, mayroon sa mga group chat na mga unregistered drugs. Ito po, hindi talaga tayo sigurado. Malamang counterfeit po ito o kaya mga substandard.” ani FDA Director General, Usec Eric Domingo.
Nitong weekend, nakasabat ang Bureau of Customs ng halos P30 million na halaga ng unregistered medicine na Lianhua Qingwen na nagmula sa Hongkong.
Hindi na rin matunton ang consignee ng shipment sa address kung saan dapat dadalhin ang kontrabando.
“Actually, may FDA clearance yung Lianhua but on very specific descriptions meaning it has to be—the label has to be in English form. Tapos, mayroon lang siyang exclusive importer-distributor dito sa Pilipinas.” ani BOC Spokesperson, Atty Vincent Maronilla.
Nilinaw naman ng FDA na bagaman rehistrado sa ahensya ang Lianhua Qingwen ay hindi naman ito aprubado bilang gamot sa COVID-19.
“Approved siya as traditional Chinese medicine para sa asymptomatic relief ng mga sakit katulad ng mga ‘pag may inuubo o nilalagnat. Hindi siya approved specifically for COVID-19 at maaari lang po siyang gamitin kung ire-reseta ng doctor at ituturo sa inyo ang tamang dosage.” ani FDA Director General, Usec Eric Domingo.
Bunsod nito, nagpaalala ang mga kaukulang government agency sa publiko na bumili lang sa mga lisensyado at otorisadong bilihan ng mga gamot.
(Asher Cadapan Jr. | UNTV News)
Tags: COVID-19 Vaccine, FDA
METRO MANILA – Kinumpirma ng Department of Health (DOH) kamakailan na nakapasok na sa bansa ang subvariant BQ.1, at pinaniniwalaang ito ay mas nakahahawa.
Sa pagsisimula ng Bakunahang Bayan Program ng DOH, muling hinimok ng kagawaran ang mga magulang na pabakunahan na ang kanilang mga anak
Layon ng programa na mas marami pang kabataan edad 5-17 taong gulang ang mabakunahan, lalo’t nangangailangan ang mga ito ng proteksyon ngayong balik face-to-face na ang pasukan.
Ayon kay Dr. Gloria Balboa, Regional Director ng DOH-Metro Manila Center for Health Development, target nilang mabakunahan ang mahigit 529,000 na mga bata edad 5-11 at mahigit 158, 000 na may edad 12-17 sa National Capital Region (NCR).
As of December 5, mahigit 13 milyon na ang naturukan ng first dose sa NCR.
Habang mahigit 12 milyon naman ang fully vaccinated.
Ang Bakunahang Bayan program ng DOH ay sinimulan kahapon (December 5) at magtatapos bukas (December 7) araw ng Miyekules.
(Gladys Toabi | UNTV News)
Tags: BQ.1 Subvariant, COVID-19 Vaccine, DOH
METRO MANILA – Maaari nang makatanggap ng booster dose kontra COVID-19 ang lahat ng mga edad 12 hanggang 17.
Ito ang inanunsyo ng Department of Health (DOH) sa twitter page nito kahapon.
Ginawa ng DOH ang anunsyo isang linggo matapos ipagpaliban ang pagbibigay ng first COVID-19 booster dose para sa non-immunocompromised na mga menor de edad bunsod ng limitasyong itinakda ng Health Technology Assessment Council (HTAC).
Ayon naman kay Health Undersecretary Maria Rosario Vergeire, maaari nang mag-umpisa sa pagkakaloob ng booster dose ang lahat ng implementing units kung may kapasidad na ang mga itong mag-administer ng anti-coronavirus booster shot.
Sa Davao City, sinimulan na nitong Lunes (July 4) ang roll out ng first booster shot sa mga menor de edad.
Paalala ng DOH sa mga magulang o guardian, dalhin ang vaccination card at valid id ng batang babakunahan pati ang dokumentong magpapatunay ng inyong relasyon sa bata.
Para sa karagdagang impormasyon, maaaring makipag-ugnayan sa inyong barangay o sa lokal na pamahalaan.
Tags: Booster, COVID-19 Vaccine
Matapos umpisahan sa ilang mga piling ospital ang pagbabakuna ng booster sa mga immunocompromised na mga 12 to 17 years old nitong Martes, nagsimula na rin ang roll-out ng ilang mga LGU sa National Capital Region noong Miyerkules, June 22, para magbakuna ng booster sa naturang priority group.
Kabilang dito ang lokal na pamahalaan ng San Juan City kung saan aabot sa dalawampung mga batang 12 to 17 years old na immunocompromised ang dumating sa Cardinal Santos Medical Center upang magpabakuna ng booster dose.
Batay sa datos ng San Juan LGU, nasa higit limang libo na mga kabataan sa nasabing age group ang target na mabigyan ng booster dose sa lungsod kasama na ang mga healthy minor.
Ayon kay Mayor Francis Zamora, pinaghahandaan na rin nila ang booster dose vaccination sa healthy minors kung saan ang Greenhills Shopping Center ang gagamiting vaccination site para dito.
“Once we start with our 12 to 17 that are not immunocompromised, I am sure na papayagan kami sa aming regular vaccination sites gaya ng pagpayag naman sa amin noon nung binakunahan namin sila ng first at second dose, handa naman tayo, meron tayong greenhills vaccination sites,” ani Mayor Francis Zamora, San Juan City.
Bukod sa San Juan City, nagsimula na rin kahapon ng booster vaccination sa immunocompromised na 12 to 17 ang syudad ng Maynila. Ang old building ng Ospital ng Maynila ang nagsilbing vaccination site.
Habang ang Mandaluyong City naman, nag-anunsyo na sa kanilang facebook page para iparehistro ng mga magulang ang kanilang mga anak na immunocompromised.
Wala pang sinabi ang Mandaluyong City kung kailan magsisimula ng first booster shot para sa 12 to 17 years old.
Ayon sa ilang mga magulang, nagdesisyon na silang agad pabakunahan ng booster ang kanilang mga anak upang magkaroon ng ibayong proteksyon lalo’t inaasahan na ang muling pagbubukas ng face-to-face classes.
Bukod dito, mainam din anila na ma-booster ang kanilang anak lalo’t may naitatala nanamang pagtaas ng mga kaso ng Covid-19.
Nauna nang sinabi ng National Vaccination Operations Center na maaaring ngayong darating na weekend ay masimulan na rin ang roll-out ng first booster shot para naman sa grupo ng healthy minors kung saan bukod sa mga ospital, maaari na itong isagawa sa iba pang mga vaccination site ng mga LGU.
(JP Nuñez | UNTV News)
Tags: Booster Shot, Covid-19, COVID-19 Vaccine
