Tatlong araw na ang nakalipas mula nang manalasa ang Bagyong Nina sa kabikulan subalit banaag pa rin sa maraming residente ang pinsalang iniwan ng bagyo.
Maliban sa probinsya ng Catanduanes at Camarines Sur, naapektuhan rin ng bagyo ang Polangui, Albay.
Batay sa ulat ng Office of the Civil Defense Region 5, nasa 18,965 pamilya o katumbas ng 88,338 persons ang nabiktima ng bagyo sa Polangui.
Kabilang na dito si Aling Cristita Relato na naabutan namin sa tabi ng kalsada sa Brgy. Cabangan, Ilaor Sur, na pilit na isinasalba ang mga nabasang aklat at kuwaderno ng kanyang tatlong anak.
Nasira din ang kanilang tahanan ngunit hanggang ngayon ay wala pa silang natatanggap na anumang tulong mula sa lokal na pamahalaan ng Albay.
Ayon sa isang barangay kagawad ang dapat sana’y 100% na relief goods para sa kanilang barangay, 60 porsyento lang umano ang kanilang natanggap.
Paliwanag naman ni Polangui Vice Mayor Herbert Borja, hindi pa dumarating sa kanilang lugar ang lahat ng relief packs mula sa DSWD.
Inaasahang bukas o sa Sabado umano ay maipamamahagi nila sa iba pang biktima ng bagyo ang karagdagang relief goods.
Tiniyak naman ni Borja na gumagawa na sila ng paraan para matulungan ang mga residente.
Nakipag-ugnayan na rin sila sa iba pang ahensya at non-government organizations para sa recovery efforts.
(Allan Manansala / UNTV Correspondent)
Tags: Albay, idinadaing ang umano’y kulang na supply ng relief goods sa Polangui, Ilang biktima ng Bagyong Nina
Ipinaliwanag ng Philippine Institute of Volcanology and Seismology (PHIVOLCS) na ang nakitang tila puting guhit sa dalisdis ng Bulkan Mayon sa Albay ay mga volcanic deposits sa naghalo sa tubig ulan kaya’t umagos ito sa paanan ng bundok.
Gayun man, nagpaalala pa rin ang Office of Civil Defense 5 sa local government unit ng mga bayang nasa paligid ng bulkan na maging alerto sa mga posibleng mangyari kung patuloy na magkakaroon ng pagaagus ng maraming tubig sa Mayon.
Patuloy din ang koordinasyon ng ahensya sa PHIVOLCS maging sa Albay Public Safety and Emergency Management Office hinggil sa kalagayan ng bulkan ngayong patuloy itong kinakikitaan ng aktibidad.
Nananatili pa rin sa ngayon sa alert level 1 ang Mt. Mayon.
Nagpasya ang Philippine Institute of Volcanology and Seismology (Phivolcs) na ibaba sa alert level 3 ang babala ng Bulkang Mayon.
Kasunod ito ng patuloy na pagkaunti ng aktibidad ng bulkan. Pahihintulutan na rin ng lokal na pamahalaan ng Albay na makauwi ang may 55,000 evacuees na nakatira sa 8-kilometer extended danger zone sa palibot ng bulkan.
Mananatili naman sa mga evacuation centers, ang mahigit sa dalawang libong pamilya na nakatira sa 6-kilometer permanent danger zone at 7-kilometer extended danger zone.
Ito ay hanggat hindi naibababa sa alert level 2 ang babala ng bulkan.
( Allan Manansala / UNTV Correspondent )
Tags: Albay, alert level 3, Bulkang Mayon
Dumating na sa Albay ang 21 truck ng Department of Social Welfare and Development (DSWD) na puno ng relief goods. Kaagad nagtungo ang mga ito sa mga evacuation centers sa walong bayan na apektado ng pag-aalboroto ng Bulkang Mayon.
Ang mga ito ay ang Guinobatan, Camalig, Daraga, Malilipot, Sto. Domingo, Tabaco City, Ligao City at Tabaco City. Aabot sa 24,000 relief packs ang dala ng hatid tulong Mayon caravan ng DSWD.
Bawat relief packs ay nagkakahalaga ng P402. Naglalaman ito ng anim na kilong bigas , ilang de lata gaya ng corned beef at sardinas at mayroon ding ilang balot ng kape.
Una rito ay namahagi na rin ng halos kapareho ring laman ng relief goods ang (Metropolitan Manila Development Authority (MMDA) at ilang local government officials sa Metro Manila kahapon.
Samantala, pinabulaanan naman ng opisyal ng Brgy. Lidong sa Sto. Domingo, Albay ang napabalita na diumano ay may natanggap silang sirang relief goods.
Paalala ng DSWD, kung sakaling makakakuha o makakatanggap man ng mga sirang relief goods ang mga evacuees, agad itong ipaalam sa kanilang tanggapan.
( Allan Manansala / UNTV Correspondent )
Tags: Albay, DSWD, relief goods
