Sa pagnanais na makapagbigay ng impormasyon sa mga turistang dumarayo sa Iloilo Province, gagamit ng Quick Response (QR) codes ang Iloilo Provincial Tourism Office sa mga munisipyo at landmarks sa lalawigan.
Ayon kay Iloilo Provincial Tourism Officer Bombit Marin, mapapabilis nito ang pagbibigay ng impormasyon sa mga local at domestic tourists na pupwede nilang ma-explore sa Iloilo katulad ng mga historical sites, beaches, camping areas at iba pa.
Ayon kay Marin, madalas na pinupuntahan ng mga turista ang mga tourism information centers na nakakalat sa lalawigan upang pagtanungan ng mga impormasyon hinggil sa kung ano pang mga tourism sites ang maaaring puntahan ng mga turista at papaano makakarating dito.
Ngunit kapag holidays at weekends ay sarado ang mga information centers kung kaya’t walang malalapitan ang ibang mga turista.
Upang masulusyunan ito, maglalagay ng mga QR codes ang Iloilo Tourism Office sa bawat munisipyo at ilang landmarks sa lalawigan.
Sa pamamagitan ng isang QR code reader application, maaaring i-scan ng mga android at IOS phone ng mga turista ang mga naturang QR codes upang ma-access ang mga impormasyon na nakalagay dito.
Nais din ng Tourism Office na sa pamamagitan ng mga QR codes ay maipaalam ang kasaysayan sa mga naturang tourist destinations.
Samantala, patuloy naman ang pagtaas ng bilang ng mga turistang dumarayo sa Iloilo Province.
Noong nakaraang taon, umabot sa mahigit 300,000 local at foreign tourists ang bumisita sa lalawigan ng Iloilo. Mas mataas ito kumpara sa mahigit 250,000 na mga tourista noong 2016.
Umaasa naman ang Iloilo Provincial Tourism Office na makakatulong ang QR codes upang makapagbigay ng kaalaman sa mga turista at mapataas pa ang tourist arrivals sa lalawigan.
( Vincent Arboleda / UNTV Correspondent )
Ngayong Lunes na magsisimula ang nationwide brigada eskwela ng Department of Education bilang bahagi ng paghahanda sa nalalapit na pasukan sa Hunyo.
Kailangang malinisan ang mga paaralan dalawang linggo bago ang opening ng mga klase dahil dalawang buwan rin itong hindi ginamit dahil sa bakasyon.
Dito sa Iloilo City, bukod sa pag-aayos sa mga silid-aralan ay isinusulong rin ang paglilinis sa paligid ng eskuwelahan upang masegurong ligtas ang mga estudyante mula sa mga sakit gaya ng dengue fever.
Ayon sa Iloilo Provincial Health Office, kailangang mapaigting ang anti-dengue drive sa mga paaralan dahil tumaas ang kaso nito sa probinsiya ngayong 2016.
Mula Janunary hanggang May-7 ay umabot sa 794 ang kaso ng dengue sa lalawigan at tatlong bata na may edad sampu pababa ang nasawi.
Mas mataas ito sa naitalang 279 cases at dalawang nasawi noong 2015.
Posibleng madagdagan pa ang mga kaso ngayong umiiral na ang panahon ng tag-ulan sa bansa.
Ayon sa health office, kailangang malinis ang mga pinamumugaran ng lamok gaya ng basurahan, gulong ng sasakyan, bubong at mga kanal.
Inirekomenda rin ng PHO na kung maaari ay mag-spray ng insecticide sa mga marurumi at madadamong lugar sa paaralan.
Paalala naman ng PHO sa mga magulang na huwag na papasukin ang mga batang may sintomas ng dengue o iba pang karamdaman upang huwag itong makahawa sa iba pang bata.
(Lalaine Moreno / UNTV Correspondent)
Tags: dengue, Iloilo province, mga estudyante, pagtaas ng kaso
