Posibleng i-akyat ni Sen. Vincent Sotto III sa plenaryo ng Senado ang isyu ng umano’y hindi pagiging patas ng ilang miyembro ng ethics committee sa paghawak ng mga reklamo laban kay Sen. Leila De Lima.

Ito ay matapos akusahan ni De Lima ang ilang mga miyembro ng pagiging ‘biased’ o ‘hostile’ sa kanya sa mga nakaraang pagdinig ng Senado, at sa mga interview sa media.

Hamon ng senadora sa mga ito na mag-inhibit nalang sa mga reklamo laban sa kanya.

Ginagarantiya naman ni Sen. Sotto, Chairman ng Ethics Committee, na magiging patas sila sa pagdinig ng mga reklamo laban sa Senadora.

Bagaman Chairman siya ng komite, hindi inimpluwensyahan ni Sotto ang sinumang miyembro nito.

Pero paliwanag ng Senador, kung sakali mang nakompromiso na ang pagiging patas ng komite, maaaring iakyat na niya ang isyu sa plenaryo ng Senado para ito ang tumayong committee of the whole

Samantala, tumanggi namang magbigay ng pahayag ang Ethics Committee members na sina Senators Risa Hontiveros at Panfilo Lacson.

Habang si Sen. Chiz Escudero naman, sinabing karapatan ni Sen. De Lima na maghayag ng opinyon ngunit nasa bawat Senador pa rin ang desisyon kung nais nilang mag-inhibit.

Sa ngayon, dalawang Ethics Complaint ang nakahain laban kay De Lima hinggil sa naging relasyon nito sa dating driver-body guard na si Ronnie Dayan at ang umanoy pag-uutos dito na huwag dumalo sa pagdinig ng kamara sa isyu ng Bilibid Drug Trade.

Una nang sinabi ng Senadora na handa siyang harapin ang mga reklamo dahil may hurisdiksyon sa kanya ang Ethics Committee.

(Joyce Balancio / UNTV Correspondent)

Tags: Isyu ng umano’y hindi pagiging patas ng Ethics Committee kay Sen. Leila De Lima, maaaring i-akyat sa plenaryo ng Senado