Kaligtasan ng mga 17 Pilipinong na-hostage sa Red Sea, tinututukan ngayon ng pamahalaan

by Radyo La Verdad | November 24, 2023 (Friday) | 4520

METRO MANILA – Sinisiguro ni Pangulong Ferdinand Marcos, Jr. na ginagawa ng kaniyang administrasyon ang lahat upang matiyak nito ang kaligtasan ng labing-pitong (17) Pilipinong na-hostage matapos ma-hijack ang sinasakyan nitong cargo vessel na Galaxy Leader sa Red Sea nitong Linggo, November 19.

Ayon sa Pangulo, nakikipag-ugnayan ngayon ang Departmant of Foreign Affairs (DFA) sa mga bansang Iran, Oman, Qatar at Saudi Arabia upang bantayan ang kasalukuyang sitwasyon.

Patuloy rin aniya ang Department of Migrant Workers (DMW) sa pakikipag-usap sa pamilya ng mga biktima upang ipag-alam ang kalagayan ng mga ito.

Kinumpirma ng DFA nitong Miyerkules (November 22) na kabilang ang 17 Pilipino seafarers sa 25 crew members ng Galaxy Leader na nabihag ng mga rebeldeng grupo na Houthi.

Ayon sa ilang ulat, target ng mga Houthi ang mga barkong may kaugnayan sa bansang Israel at maging ang mga bansang kaalyado nito.

(Jasha Gamao | La Verdad Correspondent)

Tags: ,

Mga Pinoy na nasa Gaza, pinalilikas na ng pamahalaan dahil sa inaasahang mas matinding bakbakan

by Radyo La Verdad | October 16, 2023 (Monday) | 6660

METRO MANILA -Isinailalim na ng pamahalaan ng Pilipinas sa Alert Level 4 o mandatory evacuation ang Gaza dahil sa patuloy na kaguluhan sa lugar sa pagitan ng Israeli forces at Palestinian militant group na Hamas.

Ayon kay Department of Foreign Affairs (DFA) Spokesperson Ma. Teresita Daza, tukoy na ng gobyerno ng Pilipinas ang 131 Filipino nationals na nasa Gaza. 78 sa kanila ang nasa Rafah Border at patawid na malapit sa Egypt.

Habang ang iba ay nakaalis na mula Northern Gaza o Gaza City na inaahasang magiging sentro ng mas matinding labanan.

Tiniyak naman ng DFA na patuloy ang pag-asikaso sa repatriation ng mga Pilipino sa lugar.

Sa isang video sa kanilang Facebook page, nanawagan ang Israel Defence Forces (IDF) sa mga sibilyan sa Gaza na lisanin na ang lugar dahil sa kanilang inilunsad na opensiba laban sa Hamas.

Nagbigay pa ng evacuation route ang IDF at 3 oras na pagtigil ng opensiba upang makalikas ang mga sibilyan.

Pero batay sa ilang mga ulat, pinipigilan umano ng Hamas ang mga sibilyan na lisanin ang Gaza City.

Naglabas din ng mga recorded na usapan sa telepono ang IDF kung saan sinasabi ng 1 residente sa Gaza na hindi sila pinapaalis ng Hamas.

Ayon naman kay United Nations Secretary-General Antonio Guterres, napaka-delikado ng babalang mass evacuation.

Nanawagan din ito na mabigyan ng humanitarian access ang mga relief workers ng UN para makapaghatid ng ayuda sa mga naiipit sa bakbakan.

Tags: , , ,

Walang Pilipinong nasawi o nasaktan sa magnitude 6.8 quake sa Morocco – DMW

by Radyo La Verdad | September 11, 2023 (Monday) | 3923

METRO MANILA – Walang naiulat na nasaktan o nasawi sa magnitude 6.8 lindol, na tumama sa Morocco nitong Biyernes September 8.

Sa isang panayam, sinabi ni Department of Migrant Workers Officer in Charge Hans Leo Cacdac, na wala pa silang natatanggap na report ng mga Pilipinong nasaktan sa nangyaring lindol doon.

Gayunman patuloy anila silang naka-monitor sa sitwasyon.

Pinayuhan naman ng Philippine Embassy sa Morocco ang mga Pilipino na manatiling kalmado, pero maging alerto sa mga posibleng epekto ng nangyaring lindol sa naturang bansa.

Umabot na sa mahigit 2,000 ang nasawi sa bansa dahil sa malakas ng pagyanig.

Tags: , ,

Mga Pilipino sa Russia, patuloy pa ring pinag-iingat    

by Radyo La Verdad | June 27, 2023 (Tuesday) | 12418

Wala sa mga Pilipino ang nadamay sa tensyon na nangyari sa ilang lugar sa Russia partikular sa Rostov-on-Don na sinakop ng Russian paramilitary wagner group.

Ayon kay Department of Foreign Affairs Undersecretary for Migrant Workers Affairs Undersecretary Eduardo de Vega, patuloy ang kumonikasyon ng embahada ng Pilipinas sa sampung Pilipino na kasalukuyang nakatira sa Rostovondon.

“ ’yung Rostov, yung kinukuha ng wagner group konti lang yung Pilipino doon labing-isa o sampu lang kaya lahat nakikipagugnayan ‘yan sa embahada na safe sila,” ani Usec. Eduardo de Vega, DFA.

Noong Sabado, June 24, napaulat na sinakop ng wagner group ang Rostovoondon na isa sa pinakamalaking lungsod sa southern Russia.

Ito ay kasunod ng umano’y pang-aatake ng Russian military sa mga tauhan ng private mercenary wagner group na pinamumunuan ni Yevgeny Prigozhin.

Agad naghain ang National Anti-terrorism Committee ng Russia ng kasong kriminal laban kay Prigozhin dahil sa mga paratang at pag-uudyok nito sa armadong rebelyon.

Ngunit kamakailan lang, nagkasundo ang dalawang paksyon na hindi na itutuloy ng Russian government ang pagsasampa ng reklamong pagtataksil laban kay Prigozhin, at magtungo na lamang sa Belarus dahilan ng paghupa ng tensyon.

Sa panayam ng UNTV news sa ilang Pilipinong nakatira sa Moscow Russia na naghigpit din ng kanilang seguridad, nasa maayos naman ang kanilang sitwasyon doon.

Pero kahit pa man, humupa na ang tensyon sa lugar, ayon kay usec. De Vega hindi pa rin titigil ang pamahalaan sa pagmu-monitor sa sitwasyon sa lugar at kalagayan ng  Overseas Filipino Workers doon.

pinapayuhan ng DFA at ng embahada ng Pilipinas ang mga pilipino sa russia na maging mapag-matyag at umantabay pa rin sa mga abisong ilalabas ng Philippine embassy.

Pinaiiwas rin ang mga ito sa matataong lugar gayundin sa pakikilahok sa mga demonstrasyon at huwag mag-post ng anomang political comments sa social media na hindi kumpirmado.  Maging sa pagbiyahe sa ibang rehiyon kung hindi naman kinakailangan.

Sa tala ng Department of Foreign Affairs, nasa sampung libong mga Pinoy ang naroroon ngayon sa Russia at siyamna libo nito ay nakatira sa moscow.

Janice Ingente/UNTV News

Tags: , ,

More News