Sa ikalawang pagkakataon ay muli na namang ipinagpaliban ng Sandiganbayan ang pagdinig sa plunder case ni former Senator Ramon “Bong” Revilla Jr. dahil sa nakabinbing motion to quash na inihain ng abogado nitong si Atty.Estelito Mendoza.

Nakasaad sa mosyon na hindi sapat ang mga impormasyon na nakasaad sa kaso laban sa dating senador upang sampahan ito ng plunder case kaugnay sa umano’y maanomalyang paggamit sa kanyang Priority Development Assistance Fund o PDAF.

Walang rin umanong hayag na “criminal acts” na nagawa si Revilla at ang co-accused nito na si Richard Cambe batay sa plunder law.

Ayon pa sa abogado nito, ang pag-eendorso ni Revilla ng mga non-gov’t organization kay Janet Napoles ay maituturing na “innocent acts” at ang mga sinasabing paglabag na nagawa ni Revilla ay maikakategorya lamang sa kasong bribery.

Sinabi naman ng prosekusyon na ang motion to quash ng kampo ni Revilla ay isang lamang delaying tactic ng akusado.

Tumanggi naman na magbigay ng pahayag si Revilla hinggil sa kaso at sinabi lamang na nasa maayos ng kondisyon ang kanyang ama na sumailalim sa heart operation kahapon.

Samantala, hindi naman natuloy ang pagbasa ng sakdal kay dating COMELEC Chairman Benjamin Abalos sa kasong graft dahil sa umano’y maanomalyang pagbili nito ng dalawang service vehilce na hindi dumadaan sa public bidding noong 2003.

Naghain ng motion for reconsideration si Abalos laban sa resolusyon ng korte na idismiss ang kanyang motion to quash.

Sa April 27 muling itinakda ang arraignment ni Abalos.

(Mon Jocson / UNTV Correspondent)

Tags: hiniling na madismis ang kanyang plunder case, Kampo ni dating Senador Bong Revilla Jr.