Nais ng lokal na pamahalaan ng Butuan na tuluyan nang maalis ang mga street children sa siyudad.
Bunsod nito, nagpatayo sila ng “Home for the boys” na magiging pansamantalang tahanan ng mga kabataang nagpapalaboy-laboy lang at nalilihis ng landas.
Layon nito na tulungang makapagbagong-buhay ang mga menor de edad na inabanduna ng magulang, mga nakaranas ng pang-aabuso, mga batang napabilang sa gang at mga batang na nagugumon sa masamang bisyo tulad ng pagso-solvent.
Dito, kakalingain sila at irerehabilitate kung kinakailangan at pagdating sa hustong gulang, hahanapan sila ng City Social Welfare and Developement ng mag-aampon sa kanila.
Nasa tatlong daang libong piso hanggang apat na raang libong piso ang ilalaang pondo ng lokal na pamahalaan dito kada taon. Inaasahang magsisimula na ang operasyon ng rehabilitation center sa Abril.
Sa ngayon base sa datos ng CSWD, mayroon nalang dalawampu’t anim na street children sa siyudad na pansamantalang nananatili sa kanilang lingap center.
( Raymond Octobre / UNTV Correspondent )
