Kaalinsabay sa pagdiriwang ng World Wetlands Day noong Sabado, binigyang diin ni Senate Committee on Environment and Natural Resources Chairperson Cynthia Villar ang kahalagahan ng pangangalaga sa Las Piñas Parañaque Critical Habitat and Ecotourism Area (LPPCHEA).
Nais anilang ingatan ang naturang lugar na idineklara ng Ramsar Convention bilang isa sa most important wetland park sa mundo dahil sa 84 species ng mga migratory birds na makikita dito.
Bukod dito, nasa 35 hectares nito ang napapalibutan ng mga mangrove forest na bukod sa nagiging tahanan at pangitlugan ng mga isda na nagbibigay ng kabuhayan sa mga mangingisda ay nagpoprotekta din laban sa typhoon surge.
“Diyan po sa ating mangrove forest pinapanganak ang lahat ng mga fingerlings na pumupunta sa Manila Bay, so it is giving livelihood to the 300,000 fishermen in Manila Bay, saan kayo makakakita ng ganun pinoprotektahan na tayo sa typhoon surge at flooding nagbibigay pa ng hanapbuhay sa ating mahihirap na mga mangingisda sa Manila Bay,” sabi ni Senator Villar.
Nais rin aniyang mapanatili ang ganda nito upang maisakatuparan ang plano nilang gawing tourist spot.
“I think in a few months’ time DOT will start the wetland center, plus yung mga natural facilities like bird watching at saka yung nature trail at saka yung gagawin na DAB farm na aquaculture facility, dito simple lang yun, and then of course we’re hoping that the MVP group will develop our ports so we can do a river cruise here coming from Las Piñas,” dagdag niya.
Suportado naman ni MMDA Chairman General Danilo Lim ang proyektong ito ni Senator Villar.
“At itong Las Piñas Parañaque Wetland Park na ito ay isa lamang sa kakaunti nang wetlands na natitira, in fact ito ay kaisa-isa nalang dito sa Metro Manila, so kailangang pangalagaan natin ito laging nililinis ime-maintain at ima-manage ng mabuti nang sa ganoon maprotektahan yung ecosystem,” sabi ni Lim.
Sakaling matapos na ang pagpapaganda dito, maaari itong maging pasyalan ng ilan nating mga kababayan maging mga turista.
(Randy Forastero/UNTV Correspondent)
Tags: Las Piñas Parañaque Critical Habitat and Ecotourism Area, Las Piñas Parañaque Wetland Park, Senator Cynthia Villar
Magtutungo ngayong araw sa Malacañang ang ilang kinatawan ng mga magsasaka mula sa iba’t-ibang panig ng Luzon. Nais ng mga ito na makausap si Pangulong Rodrigo Duterte upang i-apela ang pag-veto sa panukalang rice tarrification bill.
Kahapon ay una nang nagtipon ang mga ito sa Mendiola at inilahad ang bukas na liham para sa Pangulo na nais ipinarating ang kanilang pagtuligsa sa panukala at pakiusap na huwag itong lagdaan.
Nangangamba silang malugi sa inaasahang pagdagsa ng imported at murang bigas dahil kapag tuluyang naisabatas ang panukala, wala nang limitasyon sa dami ng pwedeng angkatin ng mga trader.
Nababahala rin ang mga magsasaka na bumagsak ang lokal na industriya ng butil at unti-unting pagkaubos ng magsasakang nagtatanim ng palay dahil sa rice tariffication.
At dahil wala nang limit sa importasyon, maaari din anilang magkaroon ng manipulasyon sa presyo at suplay ng butil sa bansa.
Nitong nakaraang Miyerkules, niratipikahan ng dalawang kapulungan ng Kongreso ang rice tariffication bill at inindorso sa Pangulo para malagdaan. Bahagi ng panukala ang paglalaan ng sampung bilyong pisong pondo na ibibili ng mga makinaraya para sa mga magsasaka.
Pero ayon sa grupo, hindi makinarya kundi mga farm input at hybrid na binhi ang kailangan nila.
Samantala, una ng sinabi ni Agriculture Secretary Manny Piñol na ang taripa na makukuha sa mga imported na bigas ay itutulong din sa mga magsasakang Pilipino.
Dati na ring sinabi ni Senator Cynthia Villar, ang chairperson ng Senate Committee on Agriculture na layon nitong mapababa ang presyo ng bigas sa merkado.
Hindi rin aniya lugi ang mga magsasaka dito dahil inaatasan ang National Food Authority (NFA) sa ilalaim ng rice tariffication bill na bumili ng palay sa mga lokal na magsasaka.
( Cathy Maglalang / UNTV Correspondent )
Sa ikatlong araw ng pagtanggap ng Commission on Elections (Comelec) ng mga certificate of candidacy (COC) ng mga nais kumandidato sa 2019 midterm elections, naunang dumating si Senator Cynthia Villar.
Ang adbokasiya ni Senator Villar ay pagtulong sa mga mahihirap na sektor partikular na ang mga maliliit magsasaka.
Noong 16th Congress, 27 na mahahalagang batas ang naisulong at naiakda ng senador. Kabilang na dito ang pagtatatag ng Philippine National Railways (PNR), Lemon law, Sugarcane Industry Development Act, Youth Entrepreneurship Act, Anti-agricultural Smuggling Act at iba pa.
Ngayong 17th Congress, pinangunahan naman niya ang pagpapasa sa Senado ng free irrigation law at coco levy trust fund. Nais pa ring tutukan ng senador sa ikalawang termino ang kapakanan ng mga magasasaka.
Dumating rin upang maghain ng COC si Senator Grace Poe. Dumipensa rin si Poe sa pagpabor niya noon sa pagpapasa ng tax reform package na itinuturong dahilan ng pagtaas ng presyo ng mga pangunahing bilihin.
Si Senator Joseph Victor Ejercito, bagaman humiwalay na sa partido ng kaniyang ama, hindi naman iiiwan ang apelyidong Estrada sa kaniyang COC.
Kasama naman ni Magdalo Party-list Representative Gary Alejano sa paghahain ng kaniyang COC sa pagka-senador si Senator Antonio Trillanes IV na matatapos na ang termino.
Umaasa ang kongresista na hindi siya makararanas ng political persecution dahil sa pagiging kritiko ng administrasyon.
Si Maguindanao Representative Zajid Mangudadatu ay sasabak rin sa senatorial race.
Naghain rin ng kaniyang COC si ang dating senador na si Lito Lapid, ngunit tumanggi na siyang sumagot sa tanong ng media.
Dagsa rin ang ating mga kababayan na nais ring sumabak sa paparating na eleksyon, bagaman ilan sa kanila ay ilang beses nang naghain ng COC at bigong manalo.
Huling nag-file ng kaniyang COC kahapon si Special Assistant to the President Secretary Bong Go.
Personal na sinamahan ni Pangulong Rodrigo Duterte at ilang miyembro ng gabinete at iba pang opisyal ng pamahalaan si Go sa Comelec.
Sa day 3 ng COC filing, kabuuang 63 na ang nais tumakbo sa pagkasenador sa darating na 2019 midterm elections.
( Nel Maribojoc / UNTV Correspondent )
Tags: coc, COMELEC, Senator Cynthia Villar
Bagaman hindi pa pormal na naghahain ng kaniyang kandidatura, nanguna sa pinakabagong senatorial survey ng Social Weather Stations (SWS) si Senator Cynthia Villar.
Batay sa resulta ng survey na inisponsor ni Secretary Francis Tolentino, nasa number 1 rank si Villar, habang kapwa nasa rank 2 to 3 naman sina Senator Grace Poe, at Taguig Representative Pia Cayetano.
Sa isang bukod na senatorial survey naman na isinagawa ng Pulse Asia noong ika-1 hanggang ika-7 ng Setyembre, pasok din sa top 5 sina Villar, Poe at Cayetano kasama si Senator Nancy Binay at Davao City Mayor Sara Duterte-Carpio.
Sa survey ng SWS, tabla naman sa 4th to 5th spot si dating Senate President Koko Pimentel at dating Senador Lito Lapid. Nasa pang anim at pang pitong pwesto naman sina dating Senador Jinggoy Estrada at dating Interior and Local Government Secretary Mar Roxas.
Pasok din sa tinaguriang magic twelve sina Senator Nancy Binay, Sonny Angara, Bureau of Corrections Director Ronald Dela Rosa, dating Senador Serge Osmeña at Ilocos Norte Governor Imee Marcos.
Nasa 13th to 15th place naman sina Liberal Party Senator Bam Aquino, Senator Jv Ejercito at Presidential Political Adviser Francis Tolentino.
Nasa pang labing anim na pwesto naman si Special Assistant to the President Bong Go at pang labing walo naman si Presidential Spokesman Secretary Harry Roque. Subalit hanggang sa ngayon ay wala paring pinal na desisyon si Roque kung itutuloy ang planong pagtakbong senador.
Isinagawa ng SWS ang survey noong ika-15 hanggang ika-23 ng Setyembre sa isang libo at limang daang tao sa buong bansa. Tinanong ang mga ito na kung ngayon isasagawa ang halalan, sino ang iboboto ninyong senador.
( Victor Cosare / UNTV Correspondent )
Tags: Senator Cynthia Villar, Senator Grace Poe, Social Weather Stations
