Nahaharap ngayon sa reklamong libel ang consultant ni dating Health Secretary Paulyn Jean Ubial na si Dr. Francis Cruz. Dahil ito sa pagdadawit nito sa ilang mga personalidad na sangkot umano sa maanomalya pagbili ng Department of Health sa Dengvaxia vaccines.
Nagtungo sa Quezon City Prosecutors Office ang executive director ng Philippine Childrens Medical Center na si Dr. Julius Lecciones upang magsampa ng reklamo laban kay Cruz.
Isa si Lecciones sa mga pangalang isiniwalat ni Cruz na umano’ý kasapi sa “mafia” sa DOH na siya aniyang nasa likod upang maproseso ang pagbili ng kontrobersyal na anti-dengue vaccine. Giit ni Dr. Lecciones, dumaan sa tamang proseso at batas ang pagbili ng Dengvaxia kaya’t wala aniyang katotohanan ang mga akusasyon ni Dr. Cruz sa kanya.
Samantala, handa naman umano si Dr. Cruz na harapin ang mga reklamong isinampa laban sa kanya ni Lecciones. Patuloy rin niyang pinaninidigan na totoo ang kanyang mga ibinunyag hinggil sa kwestionableng pagkakabili ng DOH sa Dengvaxia vaccines.
Isa ang Philippine Childrens Medical Center sa mga DOH accredited hospital na nagbigay ng Dengvaxia vaccines sa kanilang mga pasyente.
( Joan Nano / UNTV Correspondent )
Tags: Doctor Francis Cruz, libel complaint, Ubial
