Makukulay na float, bumida sa parada sa pagdiriwang ng Strawberry Festival sa La Trinidad Benguet

by Radyo La Verdad | March 19, 2018 (Monday) | 2162

Nagkulay pula ang kahabaan ng kilometer 6 hanggang sa munisipyo ng La Trinidad Benguet sa pagparada ng mahigit sampung makukulay na karosa sa pagdiriwang ng ika-37 taong Strawberry Festival nitong Sabado.

Naglalakihang strawberry ang disenyo ng mga float na gawa mula sa iba’t-ibang klase ng bulaklak na kulay pula at ang mapupula at mapipintog na strawberries. Ang ilang karosa gawa naman sa biodegradable materials.

Ayon sa mga designer ng mga ito, bilang pagpapahalaga ito sa kalikasan at malinis na kapaligiran.

Bawat karosa ay hila-hila ng mga ng dalawa hanggang tatlong tao, bawat float na pinarada, may kasabay na street dance performers suot ang makukulay na costumes.

May mga nagsuot ng bahag o g-string at sumayaw ng kanilang tradisyonal na sayaw. Libu-libong mga manonood ang nag-enjoy sa parada.

Subalit hindi lamang sa street dance at float parade nag-enjoy ang mga turista, mas nag-enjoy sila sa strawberry farm kung saan sila mismo ang namitas ng matatamis at mapupulang strawberry.

Taon-taon, nasa 1.7 million kilos ng strawberry ang hinaharvest ng mga magsasaka sa La Trinidad Benguet.

 

( Grace Doctolero / UNTV Correspondent )

 

 

 

Tags: , ,