Ilang militanteng grupo na nagrarally sa harap ng tanggapan ng DOLE-NCR (photo credit: Joms Malulan)

Muling nagprotesta sa harap ng tanggapan ng DOLE-NCR ang mga militanteng grupo sa pangunguna ng Kilusang Mayo Uno (KMU), at mga kaanak ng mga nasawing manggagawa ng Kentex Manufacturing Inc.

Sa ikalawang pagkakataon ay muling nagprotesta ang mga kaanak ng mga biktima kasama ang mga militanteng grupo upang humingi ng ayuda, hustisya at maipakulong ang may-ari ng nasunong na factory.

Kung hindi maibibigay ang mga ito, ipinahayag ng KMU na maiging magbitiw na lamang si Sec. Rosalinda Baldoz sa kaniyang posisyon bilang labor secretary.

Ayon naman kay DOLE-NCR Director Alex Avila, inaasahan nila na sa darating ng Biyernes, maghahain ng komento ang mga kinatawan ng Kentex upang maipaliwanag ang kanilang panig.

Samantala, sinabi ng abogado ng Kentex na si Atty. Renato A. Paraiso, hindi alam umano ng may-ari nito na hindi rehistrado sa DOLE ang subcontractor nito na CJC Manpower Services at nakahanda rin ang mga ito na magbigay ng ayuda.(Joms Malulan/UNTV Radio)