Naniniwala si Metro Manila Council Head at Quezon City Mayor Herbert “Bistek” Bautista na dapat masakop ng panukalang emergency powers ang pagtugon sa problema sa trapiko hindi lamang sa Metro Manila kundi maging ang mga karatig probinsya.

Ilan sa mga ito ay ang Bulacan, Pampanga, Laguna, Cavite at Rizal.

Ayon kay Mayor Bautista, bagamat suportado nya ang panukala, naniniwala siya na dapat ikonsidera rin ang ibang lugar dahil hindi kakayanin ng Metro Manila na tugunan ang magiging epekto sakaling ipatupad ng emergency powers.

Inihalimbawa niya ang mga proyektonggaya ng SLEX-NLEX connector at ang C6 project na tatagos sa Bulacan, Rizal at Cavite.

Kung matutuloy, mangangahulugan ito ng relocation ng nasa mahigit limamput pitong libong pamilya sa Quezon City pa lamang.

Bagaman inaasahang makatutulong upang maibsan ang traffic sa EDSA, hindi aniya sapat ang dalawang taon na emergency powers kundi dapat ay gawin itong anim na taon.

Ang emergency power bill o senate bill 11 or the proposed transportation crisis act of 2016 ay inihain ni Senate President Franklin Drilon noong Biyernes sa Senado.

Tags: Mga lugar malapit sa Metro Manila, panukalang emergency powers