METRO MANILA – Pwede nang makapasok ng Pilipinas ang mga pasahero na merong connecting flights sa 21 bansa na sakop ng travel ban.
Sa inilabas na statement ng Bureau of Immigration noong Sabado (Jan. 2), sinabi Commissioner Jaime Morente na base sa bagong panuntunan, papayagan nang makapasok ng pilipinas ang mga pasahero na meron lamang connecting flights o nag layover sa mga bansang kasali sa travel ban.
Pero yan ay sa kondisyon na hindi sila lalabas ng airport o hindi sila dadaan sa clearance ng immigration doon.
Kinakailangan rin na walang silang travel history sa mga nasabing mga bansa sa nakalipas na 14 na araw bago ang kanilang pagdating sa Pilipinas.
Muli namang ipinaalala ng Bureau of Immigration na bagaman exempted sa travel ang mga uuwing Pinoy, kinakailangan pa rin nilang sumailalim sa swab testing at makumpleto ang 14-day mandatory quarantine.
Samantala nilinaw naman ng Overseas Workers Welfare Administration (OWWA) na hindi kasama sa 14-day mandatory quarantine ang mga OFW na uuwi mula sa mga bansa na hindi naman kasali sa travel ban.
Mananatili pa rin ang dating protocol kung saan pwede nang makalabas ng quarantine hotel ang isang OFW sa oras na lumabas ang negative result ng kanyang swab testing.
(Joan Nano | UNTV News)
Tags: 21 countries, travel ban
METRO MANILA – Aprubado na ni Pangulong Rodrigo Duterte ang rekomendasyong palawigin ang travel ban sa ilan pang mga bansa na mayroong kumpirmadong kaso na ng bagong variant ng Covid-19.
Epektibo ito mula ngayong araw December 30 – January 15, 2021.
Bukod sa United Kingdom, bawal munang makapasok sa bansa ang mga foreign traveler na mula sa Denmark, Ireland, Japan, Australia, Israel, The Netherlands, Hong Kong, Switzerland, France, Germany, Iceland, Italy, Lebanon, Singapore, Sweden, South Korea, South Africa, Canada at Spain.
Ang mga biyahero naman na in transit na bago mag-December 30, papayagan pang makapasok sa bansa subalit required silang sumailalim sa facility-based 14-day quarantine.
Papahintulutan din ang mga Filipino citizens na galing sa mga nabanggit na lugar na makapasok sa pilipinas at kinakailangan ding sumailalim sa istriktong quarantine.
Maaari namang magpatupad ng dagdag na restrictions sa mga bansang mapapaulat din ang pagkakaroon ng bagong Covid-19 variant sa pamamagitan ng rekomendasyon ng Department Of Health at Department of foreign affairs.
Samantala, subject naman sa exit protocols ng Pilipinas ang outbound travel sa mga bansang may reported new Covid-19 variants.
Lahat ng specimens ng mga biyaherong galing sa mga bansang may reported cases ng new variant, isusumite sa Philippine Genome Center, Research Institute for Tropical Medicine at Univeristy of the Philippines-national Institutes of Health para sa Genome Sequencing.
(Rosalie Coz | UNTV News)
Tags: Covid-19 Variant, travel ban
METRO MANILA – Binigyang diin ng Department Of Health (DOH) na noong December 24 pa ipinatupad ang travel ban sa mga pasaherong galing ng United Kingdom (UK).
Pinabulaanan din ng DOH ang lumabas na ulat na ipatutupad lang umano ng pamahalaan ang travel restriction kung may community transmission na.
“We’d like to emphasized na iyong restriction for UK travelers in effect na po at napagdesisyunan na ng iatf simula pa nung december 24 ito ay narekomenda at naaaprabuhan ng ating pangulo. meron din po tayong nakitang report kagabi na magi-impose lamang daw tayo ng restriction kapag nandito na sa bansa ang new variant. inuulit lang po namin na mali ito” ani DOH Usec Maria Rosario Vergeire.
Dagdag pa ng DOH, nakabantay rin ngayon ang pamahalaan at ang mga eksperto sa mga bansang may kaso na ng new variant ng Covid-19 .
Magiging batayan ang mga impormasyong magmumula sa mga ito upang magpatupad ng travel ban sa mga bansang may kaso ng bagong variant ng covid upang maityak na hindi ito makakapasok sa Pilipinas .
12 bansa ngayon ang mino- monitor ng DOH sa Western Pacific Region kabilang dito ang hong kong, China, Singapore, New Zealand, Korea, Japan, Malaysia, Solomon Islands, Vietnam, Australia, Taiwan at Cambodia.
“What we like to emphasized would be ayaw po natin papasukin itong variant na ito that is why we are doing all of these measures katulad ng ginagawa natin ngayon” ani DOH Usec Maria Rosario Vergeire.
Ayon pa kay WHO Western Pacific Region Coordinator for Essential Medicines and Health Technolgies, Dr Socorro Escalante, madaming batayan ang pagtatakda ng travel ban.
Samantala, ipinaliwanag naman ng mga eskperto na variant ang termino sa bagong natuklasan sa United Kingdom.
Aon kay Dr Edsel Salvana, iisa lang ang strain ng Covid-19 at common ang mutations sa mga virus.
Ayon pa sa DOH, ibayong pag- iingat ang kailangang gawin ngayon ng publiko lalo na’t inaaral pa ang katangian ng bagong variant at kung mas malala ba ang epekto nito kumpara sa umiiral sa Pilipinas.
“Para maiwasan ang pag- mutate ng virus kinakailangan natn na mapanatiling mababa ang kaso sa bansa, kung kaunti ang mga taong na- infect mas mababa rin ang tiyansa na mag- mutate ang virus.” ani DOH Sec Francisco Duque III.
(Aiko Miguel | UNTV News)
Tags: Covid-19, travel ban
METRO MANILA – Hindi pa rin ma-kontrol ng Bureau of Immigration (B.I.) ang pagpasok ng mga biyaherong galing sa South Korea.
Kahit nagbaba na ng travel ban ang pamahalaan na bawal munang pumasok sa Pilipinas ang mga turistang galing sa Daegu at North Gyeonsang Province kung saan may pinakamaraming kaso ng COVID-19 sa South Korea.
Sa datos ng Manila International Airport Authority (MIAA) may 10 arrival at 10 departure flights ang natuloy pa rin Kahapon (Feb.28).
Ayon sa BI, hindi pa nila maipatupad ang travel ban dahil hinihintay pa nila ang kopya ng resolusyon mula sa Inter-Agency Task Force para sa detalyadong proseso sa pagpapatupad ng travel ban sa South Korea.
“Kasi wala pong indication sa kanilang passport if they are coming from those areas..yung Inter-Agency Task Force makikipagcoordinate dun sa Korean authorities para makapag issue sila ng certification to distinguish kung yung passenger po ba o yung foreign national na dumadating galing sa Korea ay galing sa mga areas of concern na yun” ani Bureau of Immigration Spokesperson Dana Sandoval.
Hangga’t wala pang malinaw na guidelines tungkol sa travel ban tuloy pa rin ang ilang flight ng ilang airline companies.
“Sa ngayon patuloy po ang ating flights to South Korea ..so once na maplantsa na po natin ang lahat ng ito maglalabas po tayo agad ng travel advisory listing down any possible flight na pwedeng ma cancel dahil sa travel ban na ito” ani Air Asia Spokesperson David De Castro.
Samantala, pansamantalang itinigil ng Cebu Pacific ang kanilang online-check in service sa lahat ng international flights.
Sa kanilang official twitter account sinabi ng Cebu Pacific na layon na hakbang na personal nilang masuri ang travel history ng isang pasahero bilang pag-iingat hinggil sa COVID-19.
Nauna na ring sinuspinde ng Philippine Airlines ang kanilang self-printed o digital boarding passes sa lahat ng domestic at international flights na bahagi pa rin ng kampanya laban sa Corona Virus Disease.
Sa ngayon tanging ang pagbiyahe pa lamang ng mga Pilipinong turista papuntang South Korea ang mahigpit na pinagbabawalan ng immigration sa Ninoy Aquino International Airport at iba pang paliparan.
(Joan Nano | UNTV News)
Tags: Coronavirus Disease, South Korea, travel ban
