METRO MANILA – Ipinahayag ng World Health Organization (WHO) nitong Sabado (June 25) na ang mabilis na pagkalat ng Monkeypox virus sa maraming bansa ay hindi nangangahulugan bilang Global Health Emergency sa ngayon.

Ang pagdami ng mga naitatalang kaso ng Monkeypox ay lumalalang banta sa kalusugan, paglalarawan ni WHO Director General Tedros Adhamon Ghebreyesus.

Gayunpaman, hinikayat ng organisasyon ang mga pamunuan ng gobyerno sa buong mundo na bumuo ng mga hakbang upang mabantayan at masolusyunan ang pagkalat nito gaya ng contact tracing, testing at siguraduhing ang mga taong high risk sa virus ay makatanggap ng bakuna at antiviral treatments.

Tinipon ng WHO ang emergency committee nito upang tukuyin kung anong antas ang dulot ng Monkeypox sa kasalukuyang kalagayan ng international community.

Samantala, nakapagtala ng hindi bababa sa 3,000 na kaso ng Monkeypox sa mahigit 50 na mga bansa sa mundo ang apektado simula nitong Mayo ayon sa WHO.

(Ian Joshua Vicente | La Verdad Correspondent)