Nirespondehan ng UNTV News and Rescue Team ang naganap na aksidente sa Guiguinto, Bulacan.
Sugatan ang driver ng motorsiklo matapos sumemplang nang masagi ng dalawang umano’y nagkakarerang pampasaherong jeep sa Barangay Tutukan kahapon ng madaling araw.
Nagtamo ng mga sugat sa iba’t-ibang bahagi ng katawan si Jeffrey Luciano, bente syete anyos.
Agad naman itong nilapatan ng pangunang lunas ng grupo.
Matapos bigyan ng first aid, dinala na ng UNTV News and Rescue ang biktima sa Bulacan Medical Center para sa karagdagang atensyon medikal.
Samantala hindi naman nahuli ang mga driver ng umano’y nagkakarerang jeep dahil agad umalis ang mga ito matapos ang insidente.
(Nestor Torres / UNTV Correspondent)
Tags: Motorcycle rider na nasagi ng umano’y nagkakarerang jeep sa Bulacan, tinulungan ng UNTV News and Rescue Team
Tinulungan ng UNTV News and Rescue ang dalawang lalaking sugatan matapos bumaliktad ang sinasakyang tricycle sa Brgy. Bogtong, Legazpi City sa Albay kahapon ng umaga.
Kinilala ang mga biktima na si Cleofaz Perez, driver ng tricycle at ang sakay nito na si Renante Blasé.
Ayon kay Mang Cleofaz Perez, hindi niya napansin ang kotse na bigla umanong lumabas mula sa isang compound sa diversion road.
Dahil dito, hindi na siya agad nakapag-preno at sumalpok ang sinasakyang tricycle sa kotse.
Nagtamo ang dalawa ng mga sugat sa iba’t -ibang bahagi ng katawan na agad nilapatan ng pangunang lunas ng grupo.
Matapos mabigyan ng first aid ay tumanggi na ang dalawa na magpadala pa sa ospital.
Samantala nagkasundo naman ang dalawang panig na babayaran na lamang ng driver ng kotse ang naging sira ng tricycle ng biktima.
(Allan Manansala / UNTV Correspondent)
Tags: 2 lalaking naaksidente sa Legazpi City, Albay, tinulungan ng UNTV News and Rescue Team
Tinulungan ng UNTV News and Rescue Team ang dalawang duguan pasahero ng tricycle, matapos bumangga sa nakaparadang 18 wheeled-truck sa Barangay Burol 2nd, Balagtas, Bulacan kahapon ng madaling araw.
Sa lakas ng pagkakabangga, nawasak ang tricycle na sinasakyan ng mga pasahero.
Nagtamo ng malalaking hiwa sa noo, kamay at mga daliri at gasgas si Andy Cabuga, trenta y tres anyos habang hiwa sa ilong at gasgas sa leeg ang tinamo ng kasama nitong si Joel Landanganon, trenta y kwatro anyos
Agad namang nilapatan ng grupo ang sugatang mga biktima at dinala sa Bulacan Medical Center.
Ayon sa driver ng tricycle na Mark Anthony Sun, nawalan sya ng kontrol sa manibela nang biglang may humatak sa braso nya habang nagmamaneho.
Sa ngayon ay nananatili sa kustodiya ng Balagtas Municipal Police Station ang tricycle driver.
(Nestor Torres / UNTV Correspondent)
Tags: 2 sugatang pasahero ng tricycle sa Bulacan, tinulungan ng UNTV News and Rescue Team
Tinulungan ng UNTV News and Rescue Team ang driver ng motorsiklo na sugatan matapos itong bumangga sa tricycle sa Barangay Canlalay, Biñan City, Laguna kahapon.
Nagtamo ng mga sugat sa kamay at paa at posibleng bali sa balikat ang biktima na kinilalang si Arturo Robles, 47 anyos.
Magkatuwang na nilapatan ng grupo at ng Biñan Emergency Rescue Unit o BERU ang mga tinaming sugat ng biktima.
Ayon sa driver ng tricycle mabilis ang takbo ng motorsiklo na bigla umanong sumalpok sa kanilang harapan.
Paalala naman ng mga otoridad sa mga motorcycle rider, huwag magpatakbo ng matulin upang agad na makaiwas sakaling mayroon itong mababangga.
Matapos bigyan ng first aid ang bitima ay inihatid na ito ng BERU sa Biñan Hospital.
(Sherwin Culubong / UNTV Correspondent)
Tags: Sugatang driver ng motorsiklo sa Laguna, tinulungan ng UNTV News and Rescue Team
