Tuloy pa rin ang anti-drug war ng Administrasyong Duterte.

Ayon sa Malacañang, pinamamahalaan ito ngayon ng Philippine Drug Enforcement Agency o PDEA habang suspindido ang anti-drug operation ng Philippine National Police dahil sa isinasagawang internal cleansing.

Sinabi rin ni Presidential Spokesperson Ernesto Abella na pinag-iisipan na ng pamahalaan ang muling pagbuhay sa Philippine Constabulary bilang suporta sa anti-drug operation ng PDEA.

Manggagaling sa militar ang mga tauhan ng bubuuing PC at national ang magiging scope ng operations nito samantalang localized naman ang sa PNP.

Umiral ang Philippine Constabulary noong 1901 hanggang 1991 bilang isa sa mga major service command ng AFP.

Layon nitong panatilihin ang peace, order at security sa iba’t ibang bahagi ng bansa.

Ayon kay Abella, ang ideyang ito ay napag-usapan sa joint command conference ng Armed Forces of the Philippines at Philippine National Police kay Pangulong Duterte noong Linggo; ngunit sa ngayon, hindi pa tiyak kung kailan ito maisasakatuparan.

(Rosalie Coz / UNTV Correspondent)

Tags: Muling pagbuhay sa Philippine Constabulary kaugnay ng anti-drug war, pinag-iisipan ng Administrasyong Duterte