Umabot na sa 49 ang naretrieved na bangkay sa Ucab, Itogon, Benguet.
Kahapon ay pito ang nakuhang bangkay kung saan halos lahat ay incomplete body parts na hindi na rin ma-identify ang gender ng bangkay dahil nasa decomposition stage na ang mga ito.
May mga kaanak pa rin ng biktima ang nasa command post at umaasang makikita o makukuha ang bangkay ng kani-kanilang mahal sa buhay na biktima ng killer landslide.
Samantala, sa tala ng Cordillera Disaster Risk Reduction Management Council, as of 3pm kahapon ay 95 na ang naitalang namatay sa pananalasa ng Bagyong Ompong. 13 sa Baguio City, 75 sa Benguet, 1 sa Kalinga at 6 naman sa Mt. Province.
Samantala, 39 naman ang nawawala, 2 sa Baguio City, at 37 naman ang naitala sa Benguet Province.
Sa ngayon ay nakaalis na rin ang mga evacuees sa evacuation center sa Ucab National High School dahil kaninang umaga ay nagresume na rin ang pasok ng mga mag-aaral.
Problema ngayon ng mga evacuees kung saan sila uupa ng matutuluyan dito sa Itogon, Benguet.
( Grace Doctolero / UNTV Correspondent )
Tags: Bagyong Ompong, bangkay, Benguet
Nakumpleto na ng lokal na pamahalaan ng Benguet ang mga kinakailangang dokumento para sa aplikasyon nito na maging minahang bayan ang walumpung ektaryang lupain sa bayan ng Itogon.
Ayon sa Mines and Geosciences Bureau (MGB) ng Cordilerra Administrative Region.
Nasuri na rin anila ang lugar at napatunayan na ligtas itong gawing small scale mining site.
Kaya naman, nagsumite na sila ng rekomendasyon sa opisina ni Department of Environment and Natural Resources (DENR) Secretary Roy Cimatu upang pormal nang maaprubahan ang Itogon, Benguet bilang minahang bayan. Target ng MGB na masimulan ang operasyon nito sa Disyembre.
Bukod sa Itogon, isa pang bayan sa Benguet ang target gawing minahang bayan ng lokal na pamahalaan.
Kapag pormal nang nabuksan ang minahang bayan, makikinabang dito ang nasa apat na libong mga minero sa Benguet na nawalan ng hanapbuhay matapos na ipatigil ng DENR ang operasyon ng small scale mining sa buong Cordillera Region.
Ito ay matapos ang nangyaring killer landslide sa Brgy. Ucab, Itogon, Benguet noong ika-15 ng Oktubre dahil sa malalakas na pag-ulan na dala ng Bagyong Ompong, kung saan umabot sa 62 ang nasawi.
Samantala, uumpisahan na rin ng MGB Cordillera at Department of Public Works and Highways (DPWH) ang inspeksyon sa mga lugar kung saan nakatayo ang mga gusali ng DPWH sa rehiyon.
Kaugnay ito ng utos ni Secretary Mark Villar na tiyaking sa ligtas na lugar nakatayo ang mga opisina at proyekto ng kagawaran.
Ito ay upang hindi na maulit ang nangyari sa Barangay Habawel, Natonin, Mt. Province sa kasagsagan ng pananalasa ng bagyong Rosita kung saan natabunan ng gumuhong lupa ang ginagawang gusali ng DPWH.
( Grace Doctolero / UNTV Correspondent )
Tags: Benguet, DENR, minahang bayan
Hindi pa nakakarating sa ground zero ang mga heavy equipment ng DPWH at private companies para sana gamitin at mapabilis ang search and rescue operation sa Sitio Hakrang, Barangay Habawel Natonin, Mt. Province o ground zero.
Hanggang ngayon, mano-mano pa rin ang ginagawang paghuhukay ng rescuers sa mga biktima ng landslide dahil pagpunta pa lang sa ground zero ay pahirapan na limang kilometro ang kinailangang lakarin.
Aabot sa labing lima ang landslide na daraanan, ang iba dito ay hanggang bewang ang lalim ng lupa. Kailangan pang dumaan sa gilid ng bangin.
Kahapon ay nagdeklara na si Mayor Mateo Chiyawan na i-shift search and retrieval ang operasyon sa ground zero.
Aniya, dahil nagdikit-dikit na ang mga palapag ng gusali ng DPWH at tila wala nang air pocket o puwang upang pumasok ang hangin para makahinga pa ang mga pinangangambahang naipit sa ilalim.
Bunsod nito ay mababa na ang tyansa na may makukuha pang buhay sa mismong ground zero.
Sa kwento ng mga survivor sa incident commander, malakas talaga ang agos ng landslide.
Kaya posible na inanod na ang iba sa ibaba ng creek isang kilometro ang layo mula sa ground zero. Bandang alas kuwatro ng hapon kahapon ay may tatlo silang nakuha unidentified na bangkay.
Sa ngayon, labing siyam pa ang hinahanap.
Ayon kay Mayor Chiyawan, nangangamba sila na kulangin ang pagkain para sa mga rescuers.
Problema rin ang gasolina dahil walang gasoline station sa Natonin at pakonti-konti ng galon ang naiaakyat kaya kahit pa raw may equipment ay hindi pa rin daw nila ito mapapagana.
( Grace Doctolero / UNTV Correspondent )
Tags: bangkay, landslide, Mt.Province
Nasa dalawang libong elementary at high school students sa Itogon, Benguet ang hindi pa nakakapagklase simula pa noong nakaraang linggo.
Ito ay matapos ipag-utos ni Itogon Mayor Victorio Palangdan ang suspensyon ng klase sa walong paaralan sa syudad mula ika-10 ng Oktubre.
Ang mga naturang paaralan ay kabilang sa natukoy ng Mines and Geosciences Bureau (MGB) na kabilang sa mga at risk na lugar sa syudad.
Hindi pa tiyak ng lokal na pamahalaan kung hanggang kailan ang itatagal ng suspensyon dahil wala pang lugar na permanenteng mapaglilipatan sa mga estudyante.
Hinihintay rin ng LGU at Department of Education (DepEd) ang re-assessment ng MGB para malaman kung alin sa mga paaralan ang maaari pang gamitin at alin ang tuluyan nang aabandunahin.
Sa ngayon, inihahanda na ng LGU ang learning tent center na itatayo sa Bua-Itogon Benguet. Ito ang pansamantalang gagamitin ng mga apektadong mag-aaral upang makahabol sila sa kanilang aralin.
Samantala ngayong araw, nakipagdayalogo si DENR Secretary Roy Cimatu sa mga residente ng Itogon, Benguet hinggil sa stoppage order ng mga small scale mining operation sa naturang bayan.
( Grace Doctolero / UNTV Correspondent )
