METRO MANILA – Patuloy na nadadagdagan ang bilang ng mga nasawi dahil sa bagyong Odette.
Sa huling tala ng NDRRMC kahapon (December 26), umakyat na ito sa 378.
Sa nasabing bilang 218 ang unidentified habang 92 ang lalaki at 68 naman ang babae.
742 naman ang naitalang nasugatan ngunit 73 pa lamang dito ang kumpirmado.
Habang 60 naman ang naitalang nawawala.
Umabot na rin sa mahigit 1 milyong pamilya o katumbas ng 3.9 million individuals ang naapektuhan ng bagyo sa Mimaropa, Regions 5,6,7,8,9,10,11, 12 CARAGA at BARMM.
Nananatili naman sa halos 1,200 evacuation centers ang 276,037 individuals.
Samantala, naibalik na ang supply ng kuryente sa 150 lugar mula sa 281 typhoon-affected areas.
(Lea Ylagan | UNTV News)
Tags: bagyong Odette
METRO MANILA – Nagpahiwatig si Pangulong Rodrigo Duterte na magpapatuloy ang kaniyang paglilibot sa mga lugar na lubos na naapektuhan ng bagyong Odette.
Ito ay upang matutukan ang pagkakaloob ng tulong sa mga biktima ng kalamidad.
Ayon sa pangulo, tuloy ang kaniyang trabaho kahit sa holidays.
Ginawa nito ang pahayag nang bumisita sa Puerto Princesa Palawan kahapon, kabilang sa mga natamaan ng bagyo.
“So titingnan namin, hanggang pasko magtatrabaho ako. Hindi ako mag-new year. Talagang lalabas ako. sabi ko mag-overtime kami gobyerno, hindi magsara para maski na pasko. Sabi ko magsakripisyo na muna tayo tutal marami nang pasko sa buhay natin, sobra-sobra na. Itong pasko na ito ibigay natin sa tao.” ani Pangulong Rodrigo Duterte.
Bukod sa Palawan, bumisita rin ang pangulo sa Cebu kahapon (December 23).
Nanggaling na rin ito sa Siargao, Dinagat Islands, Negros Occidental, Leyte at Bohol.
Humingi naman ng paumanhin ang punong ehekutibo dahil sa aniya’y naantalang pagtugon ng gobyerno.
“Maghingi ako ng tawad na napatagal ang response sa gobyerno. Sa totoo lang, hirap din kami dito sa taas because of the so many places scattered around at malalayo. Pati yung pera. Alam mo kasi maraming nagsasalita. Yung calamity fund, up to sa mga mayors, kailangan may report ang damage ng isang lugar bago ma-release ang pera.” ani Pangulong Rodrigo Duterte.
Batay sa National Disaster Risk Reduction and Management Council (NDRRMC), nasa 52,000 mga pamilya ang walang tirahan ngayong holiday season dahil sa pananalasa ng bagyong Odette.
(Rosalie Coz | UNTV News)
Tags: bagyong Odette, Pangulong Duterte
METRO MANILA – Hindi tiyak ng Malacañang kung matatapos ng gobyerno ang recovery at rehabilitation efforts sa mga lugar na lubhang nasalanta ng bagyong Odette bago bumaba sa pwesto si Pangulong Rodrigo Duterte sa June 2022.
Gayunman, ayon kay Acting Presidential Spokesperson at Cabinet Secretary Karlo Nograles, gagawin ng pamahalaan ang makakaya nito upang mapabilis ang pagbangon sa kalamidad ng mga kababayan.
“So, kung ano iyong puwede naming simulan, anong puwede nating tapusin given the extent of the damage, given all of the recovery and rehabilitation effort that we need to put in place, begin, start and complete within six months, kung anong makakayanan natin ay gagawin po natin ang lahat ng kaya nating gawin.” ani Acting Presidential Spokesperson/ Cabinet Secretary Sec. Karlo Nograles.
Araw ng Martes (December 21) nang pirmahan ni Pangulong Duterte ang national declaration ng State of Calamity sa Regions 4b, 6, 7, 8, 10 at 13.
Hanggang sa kasalukuyan, tinataya pa rin ng pamahalaan ang kabuuang halaga ng pinsalang tinamo ng bansa mula sa bagyo.
“But we are facing this challenge plus the challenge of totally eradicating COVID-19 plus the threats of other variants, at the end of the day kailangan po nating lahat magtulungan dito. Hindi puwede na nakaatang lamang sa balikat ng iilan or ng pamahalaan lamang, but at the end of the day once we turn this over to the next administration eh marami na po kaming nasimulan, may mga natapos na, may mga nagawa na at sana ay ipagpatuloy lamang ng susunod na administration ang lahat ng mga ito.” ani Acting Presidential Spokesperson/ Cabinet Secretary Sec. Karlo Nograles.
Sa pamamagitan ng National Declaration ng State of Calamity, mapapabilis ang rescue, relief, at rehabilitation efforts ng pamahalaan at pribadong sektor gayundin ang international humanitarian assistance.
Makokontrol din ang presyo ng mga pangunahing bilihin at pangangailangan.
(Rosalie Coz | UNTV News)
Tags: bagyong Odette, Duterte administration, rehabilitation
METRO MANILA – Patuloy ang pakikipag-ugnayan ng NDRRMC sa mga lokal na pamahalaan at local disaster units ngayong nakapasok na sa Philippine Area of Responsibility ang bagyong Odette.
Batay sa forecast ng PAGASA, inaasahang maapektuhan ng malalakas na ulan at hangin na dala ng bagyo ang ilang lugar sa Visayas, ang malaking bahagi ng mindanao, maging ang ilang probinsya sa Southern Luzon Region.
Pinaghahanda rin ng NDRRMC ang ilang lugar sa Northern Luzon na posibleng mahagip ng mga pag-ulan at malalakas na hangin.
Ayon kay NDRRMC Spokesperson Mark Timbal, mahigit sampung libong barangay ang posibleng madaanan ng bagyo.
“Tinukoy na po ang lagpas sampung libong mga barangay na located doon sa mga area na posibleng tamaan nitong bagyo dyan sa kabisayaan at Mindanao and some area also of Southern Luzon. Nagpalabas rin po tayo ng warning and reminders doon sa local governments in the northern luzon area kase baka makaranas po sila ng pag-uulan din dulot ng shear line na maaapektohan ni bagyong Odette.” ani NDRRMC Spokesperson Mark Timbal.
Sa Cebu City, nakahanda na ang City Disaster Risk Reduction and Management Team sa pagresponde sa mga residente na posibleng maapektuhan ng bagyo.
Maging ang Municipal DRRMO sa Mobo, Masbate nag-brieifing na rin sa kanilang mga tauhan para sa clearing operations at canal de clogging bilang paghahanda sa kalamidad.
Nag-abiso si Palo,Leyte Mayor Ann Petilla sa kanilang mga residente na maghanda at agad na lumikas bago pa lumala ang sitwasyon.
Sa Passi Iloilo naman, mahigpit nang mino-monitor ang posibleng pagtaas ng lebel ng tubig sa Jalaur at Lamunan river upang agad na mailikas ang mga residente sa mababang lugar kung kinakailangan.
“For the prepositioning of the relief items, teams, yung search and rescue and road clearing teams natin. Na-identify nga po natin yung mga areas na at risk kaya po pinaalalahanan po natin yung mga LGUs na bago pa po dapat dumating itong sama ng panahon at nakikita po yung eminent risk doon sa area maaari pong magsagawa na ng pre-emptive evacuation.” ani NDRRMC Spokesperson Mark Timbal.
Nag-abiso na rin ang NDRRMC sa mga biyahero, na suspendido muna ang inter-island travel sa Bicol region, Eastern Visayas, Caraga, at iba pang mga lugar na maaring daanan ng bagyong Odette.
Ito’y upang maiwasan ang anumang posibleng aksidente sa karagatan at magkaroon ng stranded na mga pasahero.
Mahigpit na pakiusap ng NDRRMC sa publiko, makinig at sumunod sa abiso ng mga otoridad upang maiwasan ang anomang trahedya sa posibleng pananalasa ng bagyong Odette.
Paalala naman nito sa mga posibleng maaapektohang residente na sumunod sa health protocols sa mga evacuation center.
(Janice Ingente | UNTV News)
Tags: bagyong Odette, NDRRMC
