Bagaman isinailalim ng Philippine National Police ang buong bansa sa terror alert level three, para sa Armed Forces of the Philippines, nananatiling normal ang alert status sa Metro Manila matapos na agad na maaksyunan ang banta ng pambobomba malapit sa US embassy kamakailan.
Gayunman, nakaasiste ang Joint Task Force NCR ng AFP sa PNP sa oras na kailanganin ang dagdag na pwersa sa ipinapatupad na seguridad ng pulisya sa Kamaynilaan.
Ang pulisya ang may pangunahing katungkulaang tiyaking ligtas ang mga pangunahing siyudad sa bansa samantalang nakaalalay dito ang Hukbong Sandatahan.
Nananatili namang nasa pinakamataas na alerto ang militar sa mga conflict-affected area sa Mindanao.
At gaya ng pakiusap ni Pangulong Rodrigo Duterte sa mga Moro na makiisa sa hangaring magkaroon ng kapayapaan sa Mindanao, bukas din ang militar sa anumang pahiwatig na pakikiisa kahit sa mga teroristang grupong Abu Sayyaf o Maute group.
Samantala, muling nagbigyan ng assurance ang militar na walang dapat ika-alarma ang publiko sa security situation sa Metro Manila.
Gayunman, nagpaala-alang muli ang militar na hindi lang mga pulis at sundalo ang may katungkulang magpanatili ng seguridad sa bansa.
(Rosalie Coz / UNTV Correspondent)
Tags: AFP, Nananatiling white o normal ang alert status sa Metro Manila
