Nag-inspeksyon kanina ang Quezon City Police District sa ilang tindahan ng paputok sa Araneta Center Cubao. Isa-isang sinuri ng QCPD ang mga itinitindang paputok maging ang business permit na hawak ng mga ito.
Ayon kay QCPD Chief PSSupt. Guillermo Eleazar, 69 na barangay sa lungsod ang itinalaga bilang firecracker zone. Ilan sa mga ito barangay Sangandaan, Tandang Sora, North Fairview Greater Lagro, Old Balara Batasan Hills at iba pa.
Partikular na itinalaga bilang firecracker zone, ang mga plaza, parke at iba pang open areas sa mga barangay. Nangangahulugan na dito lamang pinapayagan ang lahat ng mga nais na magpaputok sa pagpapalit ng taon.
Babala ng QCPD, ang sinomang lalabag sa firecracker ban ay huhulihin at papatawan ng kaukulang parusa.
Samantala, umaangal na rin ang ilang nagtitinda ng paputok sa lungsod dahil sa matumal na bentahan. Hindi tulad noong nakaraang taon, maaga pa lamang anila ay marami na sa kanilang mga suki ang bumibili ng mga paputok kaya mas malakas ang kanilang bentahan.
Ang iba naman sa ating mga kababayan, mas pinipili na lamang na bumili ng mga torotot dahil mas ligtas at abot-kaya itong gamitin.
Muli ring umapela ang Malacañang sa publiko na sundin ang inilabas na regulasyon upang lahat tayo ay magkaroon ng isang mapayapa at ligtas na bagong taon.
( Joan Nano / UNTV Correspondent )
Tags: Araneta Center Cubao, firecrackers ban, QCPD
METRO MANILA – Inatasan na ni PNP Chief PGen. Debold Sinas ang Criminal Investigation and Detection Group (CIDG) na pangunahan ang imbestigaston sa mis encounter sa pagitan ng Quezon City Police District (QCPD) – District Special Operations Unit (DSOU) at PDEA Agents sa parking lot ng isang fastfood chain sa Ever Gotesco Commonwealth Quezon City, 5:45 ng hapon kahapon.
Sa inilabas na statement ng PNP, inatasan din ni Gen. Sinas si NCRPO Director PMGen. Vicente Danao Jr, na syang opisyal na magsalita at magbigay ng mga update sa insidente.
Ayon kay Gen. Danao, bubuo sila ng task force at hihintayin muna ang resulta ng isasagawang imbestigasyon bago magbigay ng kongkretong pahayag ukol sa nangyaring misencounter.
“ Iimbestigahan muna natin both sides para makita kung pano nangyari ito, so yung may mga tama ng bala lalo na yung mga badly injured will be brought to the hospital for medication” ani NCRPO Director, PMGen. Vicente Danao Jr.
Base sa initial na imbestigasyon ng pulisya, nagsagawa ng buybust operation ang qcpd dsou sa lugar ngunit pdea agent ang kanilang nakatransaksyon.
Nauna umanong nagpaputok ng baril ang PDEA agent kayat gumanti ng putok ang mga pulis. Dalawa ang namatay sa panig ng PNP at 1 ang malubhang nasugatan. Nasugatan din ang 2 PDEA agent at 1 sibilyan.
Nakuha sa pinangyarihn ng krimen ang matataas na kalibre ng baril, mga badges at identification cards.
Kaugnay nito, agad na naglabas ng kopya ng coordination form ang QCPD na pirmado naman ng PDEA NCR kaugnay ng isinagawang operasyon.
Nakiusap naman ang tagapagsalita ng PDEA na hayaan muna silang kumalap ng mga impormasyon kaugnay sa insidente at sinabing isang lehitimong operasyon ang isinagawa ng PDEA Special Enforcement Service.
(Lea Ylagan | UNTV News)
Huli sa entrapment operation ng pinagsanib na pwersa ng Quezon City Police District (QCPD) Station 4 at Northern Police District ang limang miyembro ng budol-budol at dugo-dugo gang sa Maria Clara St. Caloocan City alas, dose ng tanghali kahapon. Kinilala ng mga suspek na sina Diane Crisostomo, Jhen Sanchez, Bernadeth De Guzman, Julieta Joseph at Melvin Pacia.
Ayon kay QCPD Station 4 Commander P/Supt. Rossel Cejas, humiling sa kanila ng tulong ang negosyante na si Robert Barit ng Baranggay Gulod, Novalichez, Quezon City.
Binentahan umano siya ng singsing ni alyas Harold na may diyamante na nagkakahalaga ng 15,000 piso noong ika-5 ng Disyembre.
Ngunit nang ipasuri ni Robert sa sanglaan, napag-alamang peke ang singsing. Kinabukasan, inalok naman ng suspek ang biktima ng relo na Rolex sa halagang 30,000 piso. Dito na lumapit ang biktima sa PNP at agad namang nagsagawa ng entrapment operation.
Narecover sa mga suspek ang dalawampu’t limang iba’t-ibang klase ng mamahaling relo, mga alahas at diamante, mga cellphone at pocket wi-fi at 66,000 piso na cash.
Samantala, napag-alaman ng mga pulis na sangkot rin ang mga suspek sa pambibiktima sa isang negosyante sa Novaliches noong ika-6 ng Oktubre.
Kita pa sa kuha ng CCTV kung papaano inipon ng kasangbahay ang mga alahas at salapi ng biktima, habang nakikipag-usap sa mga suspek sa telepono.
Aabot sa limang milyong piso ang kabuuang halaga ng natangay ng mga suspek.
Ayon sa PNP, nabiktima ng dugo-dugo gang ang kasambahay. Kaya payo ng PNP, turuan ang kanilang kasambahay na maging alerto at huwag basta-basta maniwala sa mga hindi kilalang tao.
Maaring maharap sa patong-patong na kaso ang mga suspek.
( Gerry Galicia / UNTV Correspondent )
Tags: budol-budol, PNP, QCPD
Sa madidilim na bahagi ng lansangan gaya ng mga overpass o foot bridge, karaniwang nangyayari ang mga krimen tulad ng panghohold-up.
At sa mga pagkakataong hindi tiyak ang seguridad sa lugar, ilan sa mga kasambahay natin ay may kani-kaniyang ginagawang paghahanda sakaling malagay sa ganitong sitwasyon.
Tulad ng call center agent na si Nikki Gaspar na madalas ay sa alanganing oras ng gabi pumapasok. Meron aniya siyang secret weapon na madali niyang mabubunot sakaling malagay siya sa peligrosong sitwasyon.
Ayon naman sa english teacher na si Eleazar Laude, mainam na may kaalaman din tayo sa basic self defense bukod sa laging pag-iingat lang tuwing lumalabas ng bahay.
Bunsod na rin ng pagpasok ang holiday season, magdaragdag ng police deployment ang Quezon City Police District (QCPD). Partikular na paiigtingin ang police visibility sa mga mall, mass transport system at main thoroughfares upang maiwasan na rin ang petty crimes na karaniwang nangyayari sa holiday season.
Paalala naman ng otoridad sa publiko, huwag nang maglabas ng mga mamahaling gamit tulad ng cellphone sa mga pampublikong sasakyan at iwasan magsuot ng alahas o magdadala ng maraming cash kundi rin lang kailangan at umiwas na maglakad sa madidilim na lugar.
( Gerry Galicia / UNTV Correspondent )
Tags: holiday season, Nikki Gaspar, QCPD
