Hindi dapat agad makampante ang Pilipinas sa inanunsyo ng Kuwaiti government na hinatulan na ng parusang bitay ang mag-asawang employer ni Joana Demafelis.

Ayon kay ACT OFW party-list Representative John Bertiz, noong January 2016 hindi natuloy ang pagbitay sa dalawang foreign national sa Kuwait dahil nagkaroon ng conflict sa international law, kaya posible rin umano itong mangyari sa kaso ni Joanna lalo’t hindi Kuwaiti nationals ang mga suspect sa pagpatay sa pinay worker.

Palaisipan din para sa mambabatas kung bakit walang report na natanggap ang embahada ng Pilipinas sa Syria at Lebanon kaugnay sa pagkakahuli ng mag-asawang suspek.

Matatandaang base sa report ng Kuwait, nahuli ng interpol sina Nader Essam Assaf at asawang si Mouna Hassoun sa Syria.

Itinurn-over sa Lebanon authorities ang Lebanese na si Nader habang hawak ng Syrian authorities si Mounna.

Ayon kay Bertiz, wala ring binigay na report ang interpol sa Department of Justice.

Nanawagan ang mambabatas sa Department of Labor and Employment na huwag agad bawiin ang deployment ban ng OFW sa Kuwait hangga’t hindi pa naipapataw ang parusa sa mga responsable sa pagkamatay ni Joanna.

(Grace Casin / UNTV Correspondent)