Kumpleto na ang “trusted build” ng Election Management System (EMS) na gagamitin ng Commission on Elections (Comelec) para sa 2019 elections.
Ang trusted build ay ang proseso upang buuin ang nasuri nang source code ng EMS.
Ayon sa Comelec, minadali ang pagbuo dito dahil ito ginagamit sa pagkolekta ng voter information tulad ng bilang ng mga ito at kung saan sila nakatala at ang kanilang presinto.
Mahalaga anila ito upang malaman kung ilang precint-specific ballot ang kanilang i-iimprenta.
Noong Biyernes natapos na ng foreign company na Pro V&V na suriin ang naturang programa sa Huntsville, Alabama USA at napatunayang malinis ito sa anomang malware at hindi magagamit sa pandaraya.
Ngayong araw ay nakatakda na itong i-turnover sa Comelec para sa susunod pang proseso.
Sinelyuhan ang mga “thumb drives” na naglalaman ng trusted build at executable file na magpapagana sa mga makina sa halalan.
Isinilid ang mga ito sa “water proof” envelopes na may kasamang pirma ng mga nagsuri upang tiyaking hindi ito magagamit at mababago ng kahit na sino.
( Aiko Miguel / UNTV Correspondent )
Tags: COMELEC, election management system, EMS
