
Hindi nawalan ng saysay ang pagbubuwis ng buhay ng 44 na tauhan ng PNP Special Action Force sa ikinasang Oplan Exodus.
Ayon kay PNP OIC P/ Deputy Dir. Gen. Leonardo Espina, mission accomplished ang grupo matapos kumpirmahin ng Federal Bureau of Investigation na ang Malaysian bomb expert na si Zulkifli Bin Hir alyas Marwan ang napatay noong Jan. 25 sa Mamasapano, Maguindanao.
Sinabi ni Espina na kahit masakit, naging makabuluhan naman umano ang pagkamatay ng 44 na SAF commandos dahil ang naging kapalit naman nito ay ang tiyak na kaligtasan ng publiko. (Lea Ilagan/UNTV Correspondent)
Tags: FBI, Leonardo Espina, Marwan, SAF 44

Matapos ang pagkakaaresto ni Juromee Dongon, asawa ng Malaysian terrorist na si Zulkifli Bin Hir o alyas Marwan, at ng mga kamag-anak nito, nakabantay naman ang National Capital Region Police Office (NCRPO) sa posibleng paghihiganti ng mga sympathizers ni Marwan.
Ayon kay Department of the Interior and Local Government (DILG) Officer-in-Charge Undersecretary Eduardo Año, malaki ang posibilidad na gumanti ang pwersa ng ISIS terrorist dahil sa pagkakaaresto sa asawa ni Marwan.
Ayon kay NCRPO chief PDir. Oscar Albayalde, bagama’t wala pang banta ng terorismo sa Metro Manila, mananatiling naka-full alert status dahil may mga namomonitor silang mga indibidwal at grupo na konektado umano sa ISIS terrorist group.
Matatandaang naaresto ng Philippine National Police (PNP) si Juromee Dongon kasama ang mga kapatid, bayaw at tatay nito sa Lanao del Norte sa salang illegal possesion of firearms and explosives matapos mahulihan ang mga ito ng mga bomba at baril.
Itinuturo rin umano ang mga ito na may koneksyon sa mga pinaghihinalaang terror activities sa lugar.
( Rajel Adora / UNTV Correspondent )
Tags: Juromee Dongon, Marwan, NCRPO, PNP

Ilang mga programa ang nais ipatupad ng bagong Philippine National Police Special Action Force Director Noli Taliño sa pagbabalik nito sa hanay ng SAF.
Si Taliño ang deputy director ng SAF nang mangyari ang madugong engkwentro sa MAMASAPano na ikinamatay ng 44 na SAF upang mahuli ang Malaysian Terrorist na si Zulkifli Bin Hir alyas “Marwan” noong 2015. Target niyang mapalakas ang pwersa ng SAF sa kaniyang panunungkulan.
Ayon pa kay Taliño, dapat ding pag-aralang mabuti ang mga special mission upang maiwasang maulit ang nangyari sa Mamasapano.
Samantala, buo naman aniya ang suporta ni Pangulong Rodrigo Duterte para paigtingin ang kakayahan ng SAF.
Ipinag-utos din aniya ng Pangulo na magdadagdag pa ng limang batalyon sa kasalukuyang pitong batalyon ng SAF.
Si SAF Director Taliño ay kabilang sa mga dumalo kahapon sa pag-alaala sa nasawing SAF 44 sa Camp Bagong Diwa, Taguig.
( Leslie Longboen / UNTV Correspondent )
Tags: Marwan, SAF Director Taliño, Taguig

Inalala kahapon ng sambayanang Pilipino ang kabayanihan ng 44 na miyembro ng PNP-Special Action Force na nasawi sa bakbakan sa Tukanalipao Mamasapano, Maguindanao noong January 25, 2015.
Isang Wreath Laying Ceremony ang isinagawa sa Regional Headquarters ng Police Regional Office nine sa Zamboanga City bilang pag-alaala sa Saf 44.
Ipinagpapasalamat naman ng kaanak ng Gallant 44 ang pagbibigay ng kahalagahan ni Pang. Rodrigo Duterte sa mga ito partikular na ang pagdedeklara sa January 25 bilang Day of National Remembrance.
Ngunit sa kabila ng pagpupugay at pag-alaala ng buong bansa sa Gallant 44, nais pa rin ng kanilang mga naiwang mahal sa buhay na makamit ang hustisya.
Nangako naman si Pangulong Rodrigo Duterte ng hustisya para sa mga naulila ng Fallen SAF 44.
Sa pahayag ni Presidential Spokesperson Secretary Harry Roque, nangako umano ang Pangulo na aalamin ang katotohanan sa pumalyang operasyon.
Samantala, nasawi naman sa isang pagsabog sa La Paz, Abra si Police Officer 3 Carlos Bocaig, ang isa sa mga SAF Trooper na nakaligtas sa Mamasapano encounter.
Nasawi rin ang isa pang pulis habang dalawampu’t tatlo naman ang nasugatan kabilang si Mayor Menchi Bernos at asawang si Congressman Joseph Bernos.
Sa initial na report ng La Paz PNP, nangyari ang pagsabog habang nanood ang mga biktima ng fireworks, nang biglang may naghagis ng granada sa stage kung saan naroon ang mga biktima.
( Dante Amento / UNTV Correspondent )
Tags: duterte, Mamasapano, SAF 44