Naging kalakaran na sa mga pulitiko ang party-switching o paglilipat-lipat ng partido bago at pagkatapos ng halalan. Hindi ito bawal sa ilalim ng 1987 Constitution kayat malaya ang mga pulitikong magpaiba-iba ng partido.
Ayon sa political scientist at member ng Consultative Committee (ConCom) na si Dean Julio Teehankee, nangyayari ito dahil mahina ang political party system sa bansa. Mismong ilang senador at kongresista na aniya ang nag-aalala sa ganitong sitwasyon.
Kaya naman isinusulong ngayon sa ConCom na ipagbawal na ang party-switching.
Sa ilalim ng panukala, bawal na sa isang elected official na lumipat ng partido sa buong panahon ng kanyang termino. Bawal din sa mga opisyal ng partido at sa mga talunang kandidato na magpalit ng partido dalawang taon bago o matapos ang halalan.
Pwedeng makansela ang rehistro ng partido na tatanggapin sa mga lipat-bakod na pulitiko.
Ang mga pulitikong lalabag dito, tatanggalin sa pwesto at pagbabawalang tumakbo sa susunod na halalan.
Bawal din silang i-appoint sa gobyerno at dapat ibalik nila ang nagastos ng partido sa kanilang kampanya.
Pero ayon kay Teehankee, hindi tuluyang ipagbabawal sa isang pulitiko na lumipat ng partido, ngunit hindi muna siya makakasali sa halalan sa loob ng apat na taon.
Hindi rin bawal na magkaroon ng koalisyon ang mga partido at hindi ito ituturing na party-switching.
Sa darating na Martes, pagbobotohon ng ConCom kung isasama ang panukalang probisyon sa bagong saligang-batas.
( Roderic Mendoza / UNTV Correspondent )
Tags: party-switching, pulitiko, Saligang Batas
Manila, Philippines – Kinumpirma ni PNP Chief PGen. Oscar Albayalde na may hawak na silang impormasyon sa mga pulitikong nagbigay ng suporta sa New People’s Army(NPA) nitong nakalipas na halalan.
Ayon sa hepe ng pambansang pulisya, magsasagawa sila ng validation at imbestigasyon hinggil dito.
Tumanggi naman ang ahensya na pangalanan ang mga pulitikong kasama sa kanilang listahan.
Noong 2016 national elections at 2018 barangay elections, higit 300 pulitiko ang tinukoy ng Department of Interior and Local Government (DILG) na nagbigay ng suporta sa npa gaya ng pagkuha ng permit to campaign.
Ang permit to campaign ay binabayaran ng mga pulitiko sa mga rebeldeng komunista upang makapangampanya sa mga lugar na impluwensiyado ng mga ito.
“Unang una meron tayong national task force sa ngayon to end insurgency so kasama yan sa aming legal offensive those who give support dito sa mga tinatawag naming enemies of the state.” ani PNP Chief, PGen. Oscar Albayalde.
Tags: 2019 midterm elections, DILG, Philippine National Police, pulitiko
Gaya ng nakasaad sa Saligang Batas, dapat matukoy kung saan manggagaling ang pondo para sa mga partikular na gastusin ng pamahalaan.
Kaya nanindigan si Budget Secretary Benjamin Diokno na dapat maipasa ang tax reform packages ng administrasyon upang magkaroon ng pagkukunan ng pondo sa mga proyektong nangangailangan ng dagdag na pondo, partikular na sa mga ahensyang binawasan ng panukalang pondo para sa taong 2019.
Ibig sabihin, bagaman kaunting panahon na lang ang nalalabi bago ang election period. Kung hihiling ng supplemental budget para sa mga partikular na proyekto, dapat munang maipasa ang nalalabing tax reform measures ng administrasyon tulad ng package 1B, 2, 2 plus, 3 at 4.
Kinumpirma rin ni Diokno na nagkaroon na ng kasunduan ang economic managers sa mga mambabatas partikular na kina House Committee on Appropriations Chairman Congressman Karlo Nograles at House Majority Floor Leader Roland Andaya Jr. hinggil sa 2019 proposed national budget.
Ito ay ang pagkaroon ng transitory cash-based budgeting system sa loob ng susunod na tatlong taon gaya na rin ng isinasaad sa panukalang budget reform.
Ayon sa kalihim, sa ilalim ng panukalang pondo para sa taong 2019, pinalalawig pa ang payment period para sa mga proyekto sa loob ng tatlo hanggang anim na buwan, iba sa naunang panukalang sa loob lang ng isang taon popondohan ang mga partikular na gastusin.
( Rosalie Coz / UNTV Correspondent )
Pagkakataong manaliksik at makakuha ng langis para sa China at Pilipinas ang nais ng parehong bansa para sa West Philippine Sea (WPS).
At sa pagpunta ni Foreign Affairs Secretary Alan Cayetano sa Singapore para sa 2018 Asean Ministerial Meeting, isa sa mga nakalatag na paksa ay ang pagbuo sa matagal nang hinihintay na code of conduct sa pinag-aagawang teritoryo.
May panukala na rin umanong magkaroon ng 60-40 na hatian o 60% sa Pilipinas at 40% naman sa China para sa mga yaman tulad ng langis at gas sa WPS.
Isa sa mga natukoy na planong pagdausan ng joint exploration ang bahagi ng reed bank na mayaman sa langis at maaaring pumalit sa Malampaya upang makapag-supply ng kuryente sa dalawampung porsyento ng bansa.
Posible naman umano ang nasabing hatian ayon kay acting Chief Justice Antonio Carpio, basta’t magiging sang-ayon ito sa Saligang Batas at arbitral ruling ng UNCLOS at hindi isusuko ang soberanya ng bansa.
Hindi rin dapat ituring na negatibo ang implikasyon ng pakikipagtulungan ng China pagdating sa pagkuha ng yaman at pananaliksik sa reed bank.
Ayon sa isang eksperto, dahil sa paraang ito ay mabibigyan umano ng pagkakataon ang Pilipinas na magamit ang mas advanced na teknolohiya ng China pagdating sa maritime exploration.
Nanawagan naman si dating Pangulong Benigno Aquino III kay DFA Secretary Alan Cayetano na huwag ilihim sa publiko ang detalye ng planong kasunduan sa China.
Una namang sinabi ni Cayetano na mali ang impormasyong nakararating sa dating pangulo at iginiit na walang lihim na kasunduan sa China ang Duterte administration.
( Mai Bermudez / UNTV Correspondent )
Tags: arbitral ruling, Pilipinas, Saligang Batas
