Sumulat sa Korte Suprema si Sen. Antonio Trillanes IV upang hilingin na alisin sa Makati ang paglilitis sa 200-million peso damage suit na isinampa ni Vice President Jejomar Binay.
Pakiusap ni Trillanes sa Korte Suprema, ilipat ang paglilitis sa kahit aling Korte sa Metro Manila mula sa Makati RTC Branch 133.
Ito aniya ay upang magkaroon ng patas na paglilitis sa kaso at huwag mabahiran ang magiging desisyon ng korte.
Ayon sa senador, hindi maitatangging malaki ang impluwensya at kapangyarihan ng pamilya Binay sa Makati City na tuloy-tuloy nilang pinamunuan sa loob ng 28 taon mula noong 1986.
Sa panahon aniya ng panunungkulan ng mga Binay, patuloy na nagbibigay ng allowance at suporta ang City Government sa mga Huwes at Piskal sa Makati.
Bagamat hindi siya naniniwala na makakaapekto ito sa kaso, mas makabubuti na ayon kay Trillanes na wag mapagdudadahan na may kikilingan ang mga huwes at piskal sa Makati na hahawak sa kaso.
Posible rin umanong malagay sa panganib ang kanilang buhay dahil sa kakayahan ng mga Binay na humakot ng mga tagasuporta upang hadlangan ang pagpapatupad ng kautusan ng mga otoridad.
Ayon pa kay Trillanes, posibleng dahil dito ay magdalawang isip ang mga testigo na humarap sa paglilitis sa kaso dahil sa takot na manganib ang kanilang kaligtasan.
Sinubukan ng UNTV News na kunin ang panig ni Binay ngunit wala pang sagot ang kanyang abogado.
Sinampahan ng civil case ni Binay sina Trillanes, dating Makati City Vice Mayor Ernesto Mercado at labindalawang iba pa dahil sa umano’y paninira sa kanyang reputasyon.
Ayon sa kampo ni Binay, malisyoso ang mga alegasyon nina trillanes laban sa pangalawang pangulo na idinadaan sa mga pagdinig sa Senado. (Roderic Mendoza / UNTV News)
Kasong kidnapping at serious illegal detention ang inihain ng Philippine National Police sa Department of Justice laban kay dating Senador Antonio Trillanes IV, Attorney Jude Sabio, Sister Ling at Father Albert Alejo.
Si Sabio ang abogado na naghain ng communication laban kay Pangulong Rodrigo Duterte sa International Criminal Court o ICC hinggil sa drug war.
Ang inihaing kaso ng PNP-CIDG ay hinggil sa reklamo ng businesswoman na si Guillermina Lalic Barrido, kwarentay tres anyos, mula sa Davao City na nakulong ng halos 2 linggo sa isang kumbeto sa lungsod ng Quezon noong huling bahagi ng 2016.
Noong 2017, lumutang si Barrido para ituro si Trillanes, isa sa mga staunch critic ng administrasyong Duterte, na nag-alok umano ng suhol sa kanya para siraan ang Pangulo.
Ayon sa PNP-CIDG, malinaw na intention ng mga akusado na ikulong si Barrido para pwersahin siyang gawin ang bagay na labag sa kanyang kalooban.
Dumipensa naman kaagad si Trillanes ukol dito at tinawag na harassment case at persecution ito ni Duterte laban sa kanyang mga kritiko.
Mariing itinanggi nito na nagkita sila ni Barrido at kinuwestiyon din ang pahayag nito na sa kumbento siya ikinulong.
Ayon pa kay Trillanes, nanghihingi ng pera si Barrido kapalit ng salaysay pero hindi siya tinanggap bilang testigo laban kay Duterte.
Ito naman ang sinabi ni former Sen. Antonio Trillanes IV sa isang text message, “Ito na naman ay maliwanag na harassment case at persecution ni Duterte laban sa kanyang mga kritiko. Never ko na meet yan si Guillerma Arcillas or Barrido. Saan ka makakita na pari at madre daw ang kasama ko sa pagkidnap at sa kumbento pa daw sya dinetain.”
Ayon pa kay Trillanes, “Bukod pa dyan, 2016 pa raw sya kinidnap pero ngayon lang nag-file ng kaso. Ang impormasyon ko dyan ay isa siyang nagboluntaryong mag testigo laban daw kay Duterte pero butas butas ang kwento at nanghihingi ‘di umano ng pera kapalit ng kanyang salaysay kaya hindi tinanggap bilang testigo. Tapos nang hindi nabigyan ng pera,bumaliktad.”
(April Cenedoza | UNTV News)
METRO MANILA, Philippines – Malinaw umano na panibagong panggigipit sa oposisyon ang ginawang pagbaliktad ni Peter Joemel Advincula alyas “Bikoy.” Kung saan isinasangkot na ang ilang Senador at Liberal Party na siya umanong nasa likod ng paggawa ng Anti-Duterte videos na pinamagatang “Ang Totoong Narcolist.”
Pinabulaanan ni Senator Antonio Trillanes IV ang mga naging alegasyon na ito ni Bikoy. Maaari aniya na panibagong pakana lamang ito ng administrasyon upang gipitin ang oposisyon.
Ayon pa sa Senador, kumukunsulta na siya sa kaniyang mga abogado kung ano ang maaaring isampang reklamo laban kay Advincula.
Para naman kay Senator Risa Hontiveros, panibagong tangka ito ng administrasyon upang guluhin ang publiko. Produkto aniya ito ng malikot na imahinasyon ng Malakanyang.
Ayon naman kay Liberal Party President Senator Francis Pangilinan, walang ugnayan ang partido kay Bikoy at pawang kasinungalingan lamang ang lahat ng mga paratang na nito.
Maging si Senate Minority Leader Franklin Drilon ay nagsabing walang sabwatan ang LP at si alyas Bikoy upang pabagsakin ang gobyerno kasabay ng panawagan nito sa PNP para sa malalimang imbestigasyon sa isyu.
Ipapaubaya naman ni Senator Panfilo Lacson sa mga otoridad ng imbestigasyon sa panibagong alegasyon ni Advincula. Ayon sa senador, bilang dating Law Enforcement Officer na may karanasan na sa pagkalap ng Intelligence, kailangang magpakita si alyas Bikoy ng mga totoong ebidensya na higit sa kaniyang ikinukuwento.
Si Alyas Bikoy aniya ay may seryosong problema sa kredibilidad na kailangan aniya niyang malutas.
Ayon sa dating PNP Chief, kinakailangan niyang maglabas ng matibay na ebidensya tungkol sa umanoy nangyaring pagpupulong at regular na komunikasyon sa mga taong ngayon ay inaakusahan niya.
Matatandaan na hindi na tinuloy ng komite ni Senator Lacson ang imbestigasyon sa mga unang naging akusasyon ni Alyas Bikoy.
Matapos ibulgar ni Senate President Vicente Sotto III noong ika-8 ng Mayo na dati nang lumapit sa kaniyang opisina si Advincula noong 2016 na isinasangkot sa iligal na droga sina dating Pangulong Benigno Aquino III at ilang miyembro ng gabinete nito. Kung saan naging kaduda duda na sa senador ang nagiging kilos ni Advincula.
“On my part I did due diligence kaya noong 2016, hindi ko pinatulan ito, medyo iniba lang niya kaunti ang script , iniba ang personalidad, ito naman ngayon, so perhaps the best thing again to learn from this lesson, perhaps a good lesson to ibp and religious sector na huwag basta basta ika nga e patol ng patol sa sa mga ito,” pahayag ni Senate President Sotto.
(Nel Maribojoc | UNTV News)
Tags: Bikoy, Sen. Antonio Trillanes IV, Senator Risa Hontiveros
Kahapon pa inaabangan ang desisyon ng Makati Regional Trial Court Branch 148 sa hiling ng Department of Justice (DOJ) na ipaaresto at pigilang makaalis ng bansa si Senador Antonio Trillanes IV. Pero walang inilabas na resolusyon si Judge Andres Bartolome Soriano hanggang magsara ang korte.
Nagsadya rin sa korte ang hepe ng Makati police at ang ilang tauhan ng Criminal Investigation and Detection Group (CIDG) upang humingi ng update hinggil sa kaso ni Trillanes.
Handa naman si Trillanes anoman ang maging desisyon ng Makati RTC Branch 148 na humawak noon sa kanyang kasong kudeta kaugnay Oakwood mutiny noong 2003.
Nakapagligpit na rin umano siya ng ilang gamit kung sakaling magtutuloy-tuloy ang pagpapakulong sa kaniya. Pero umaasa pa rin ang senador na magiging patas ang hukuman sa desisyon nito.
Sa ngayon, walang nakikitang mabigat na dahilan ang kampo ni Trillanes upang iapela sa Korte Suprema ang inilabas na arrest warrant ng Makati RTC Branch 150, lalo’t nakapagpyansa naman ito sa binuhay na kasong rebelyon kaugnay ng Manila Peninsula seige noong 2007.
May labinlimang araw pa si Trillanes upang maghain ng motion for reconsideration sa kautusan ni Judge Elmo Alameda at magpupulong pa aniya kaniyang mga abogado tungkol dito.
( JL Asayo / UNTV Correspondent )
Tags: CIDG, DOJ, Sen. Antonio Trillanes IV
