METRO MANILA – Inaasahan ng Department of Energy (DOE) na maglalabas ng Executive Order (EO) ang Office of the President sa posibleng paggamit ng nuclear power bilang energy security ng bansa.

“We heard from the Office of the President that the policy is going to be approved soon. It’s an executive order,” ani DOE Undersecretary Gerardo Erguiza Jr.

Noong 2020 ay pinirmahan ni President Rodrigo Duterte ang EO116 na nagtatag ng Nuclear Energy Program Inter-Agency Committee (NEP-IAC) na binubuo ng 17 ahensya na mag-aaral sa potensyal ng nuclear power sa bansa.

Ipinasa na ng Inter-Agency Committee ang findings at nagkaroon din ng partnership ang pag-aaral kasama ang iba’t ibang bansa nitong mga nakaraang taon.

Kasama sa partnership na ito ang Russia ngunit ayon kay Erguiza, ang sitwasyon ng Russia ay hindi nakakaapekto sa partnership nito sa bansa sa pag-explore ng potensyal ng nuclear power.

Sa pamamagitan ng kooperasyon, ang Russian State Atomic Energy Corporation (ROSATOM) ay nagkaroon ng pre-feasibility study sa Bataan Nuclear Power Plant (BNPP) kung saan napag-alaman na maaari pa itong mag-operate.

Ayon sa ROSATOM, kakailanganin ng USD 3 bilyon hanggang USD 4 bilyon upang masimulan ang pagsasaayos at pagsisimula ng operasyon.

Bukod sa Russia, ayon kay Erguiza, ang Pilipinas ay nakipag-partner rin sa South Korea at United States sa exploration ng nuclear potential ng bansa.

(Julie Gernale | La Verdad Correspondent)