Batay sa pinakahuling datos ng Department of Health, umaabot na sa mahigit anim na put anim na libong kaso na ng dengue ang naitatala sa bansa simula January 1 hanggang July, 16 ngayong taon.

Habang nasa halos tatlong daan na rin ang namamatay dahil dito.

Tumaas ito ng nasa halos 23 porsiyento, kung ikukumpara sa kaparehong panahon noong 2015.

Pinakamtaas ang naitalang kaso ng dengue sa CALABARZON Region na nasa mahigit walong libo.

Pangalawa sa Northern Mindanao na may mahigit sa anim na libong kaso, habang pangatlo naman ang Central Visayas Region.

Kasama rin sa may mataas na bilang ng mga tinamaan ng naturang sakit ang Socksargen at Davao Region.

Nasa apat na rehiyon ang nakapagtala ng mahigit sa isang daang porsiyento ng pagtaas ng kaso, kabilang na ang Davao Region, Negros Island, Western at Central Visayas Region.

Bunsod nito, pinag-aaralan ngayon ng kagawaran ang posiblidad ng pamamahagi ng halos anim na raang libong bakuna na hindi nagamit matapos ang isinagawang school based immunization program sa ilang paaralan sa bansa.

Nito lamang Abril nagsagawa ang DOH ng libreng pagbabakuna kontra dengue sa mga batang may siyam hanggang sampung taon sa CALABARZON, Central Luzon at NCR.

Subalit mula sa target na mahigit isang milyong mga bata na dapat mabakunahan, nasa mahigit apat na raang libo lamang ang nagpabakuna.

Paliwanag ng kagawaran, nahirapan silang mahikayat ang ilang magulang na samantalahin ang libreng bakuna, dahil nataon ito sa bakasyon ng mga estudyante.

Muli naming tiniyak ng DOH sa publiko na gagamitin ang mga sobrang bakuna, upang masiguro na hindi ito masasayang at mapapakinabangan pa rin ng mga nangangailangan.

(Joan Nano / UNTV Correspondent)

Tags: mga lugar na may mataas na kaso ng dengue, mga sobrang dengue vaccine, pinag-aaralan pa ng DOH