Nanindigan si Pangulong Aquino na walang dayuhan na lumahok sa operasyon ng PNP Special Action Force laban sa teroristang si Marwan.
Nilinaw ito ng pangulo matapos na kumalat ang isang video na nagpapakita ng isang bangkay ng dayuhan sa lugar kung saan nakaengkuewentro ng SAF ang ilang tauhan ng MILF, BIFF, at private armed groups.
Ayon sa pangulo, walang dayuhan sa hanay ng SAF sa kanilang operasyon base na rin sa mga impormasyon sa mga agensya ng pamahalaan.
Dagdag pa ng Pangulo, hindi ipinahihintulot ng ating saligang batas ang pagsama ng banyaga sa mga operasyon laban sa terorista sa bansa.(Jerico Albano/UNTV Radio Correspondent)
Nagpadala na ang Philippine National Police (PNP) ng tig isang company ng Special Action Force (SAF) sa apat na probinsiya na tinutukoy ng Memorandum Order 32 ng Malakanyang.
Ayon kay PNP Chief Oscar Albayalde, magagamit ang mga SAF troopers para wakasan ang lawless violence Bicol Region, Samar, Negros Occidental at Negros Oriental.
Nakasaad sa Memorandum Order No. 32 na dapat magdagdag ng tauhan ang PNP at AFP sa mga nabanggit na lugar kung saan aktibo ang New People’s Army (NPA).
Bukod sa SAF troopers, inatasan din ni Chief PNP ang mga hepe ng Police Regional Offices 5, 6, 7 at 8 na bumuo ng implementation plan para sa Memorandum Order No. 32.
Sa nasabing mga rehiyon nangyari ang ilang insidente ng pag-atake ng npa kabilang ang serye ng ambush sa mga tauhan ng PNP at AFP sa Bicol, Sagay massacre sa Negros Occidental, at ang paglusob sa Lapinig Police Station sa Samar.
Pinabulaanan naman ng PNP ang paratang ng mga makakaliwang organisasyon na ang hakbang na ito ay para sa napipintong martial law declaration sa buong bansa.
Sinabi naman ni AFP Spokesperson BGen. Edgard Arevalo na susuportahan nila ang layunin ng M.O. 32 dahil mandato ng AFP ang pagtiyak sa kaligtasan ng mamamayan at protektahan ang estado.
Nakatakdang namang nagpulong ang Joint Peace and Security Coordinating Council ng AFP at PNP ngayong linggo.
( Lea Ylagan / UNTV Correspondent )
Tags: PNP, PNP Chief Oscar Albayalde, SAF
Bulto bultong mga dokumento ang bitbit ng grupong citizens crime sa Office of the Ombudsman. Nakapaloob dito ang mga ebidensya ng grupo laban kay dating Pangulong Benigno Aquino III.
Sinampahan ng reklamong plunder, malversation at graft and corruption ng citizens crime si Aquino dahil sa anila’y maanomalyang pagbili at paggamit ng Dengvaxia vaccine. Ito na ang ikatlong reklamong isinampa laban kay Aquino kaugnay ng Dengvaxia controversy.
Kasamang inireklamo ng grupo sina dating Executive Secretary Paquito Ochoa, dating Budget Secretary Butch Abad, dating Health Secretary Janette Garin at 15 iba pang mga kasalukuyan at dating opisyal ng Department of Health.
Ayon kay Diego Magpantay, ang presidente ng grupo, malinaw sa isinagawang imbestigasyon ng Senado na hindi dumaan sa tamang proseso ang pagbili ng Dengvaxia at nasayang lang ang pera ng pamalahaan dahil dito.
Anila, sa 3.5 bilyong piso na budget para sa proyekto, 500 milyong piso dito ang unaccounted.
Ayon naman kay Atty. Abigail Valte, legal counsel at tagapagsalita ni Aquino, ang panibagong reklamong ito ay hindi talaga para mapanagot ang sinoman kundi nais lamang umano ng mga complainant na magkaroon ng pwesto sa gobyerno.
Pero nilinaw ni Valte na sa handa ang dating pangulo na harapin ang lahat ng mga reklamong laban sa kanya.
( Grace Casin / UNTV Correspondent )
Sinampahan ng reklamong pandarambong o plunder sa Office of the Ombudsman ang kasalukuyang direktor ng PNP Directorate for Integrated Police Operations Southern Luzon na si Police Director Benjamin Lusad.
Ang kaso ay kaugnay sa hindi naibigy na daily subsistence allowance sa mga tauhan ng SAF noong 2016 at 2017. Si Lusad ay dating pinuno ng Special Action Force.
Kaya naman kahapon, tinanggal na sa pwesto ang opisyal
Ayon kay PNP Spokesman Chief Supt. John Bulalacao, layon nitong bigyang-daan ang ginagawang imbestigasyon ng Ombudsman.
Una nang sinabi ni outgoing PNP Chief PDG Ronald Bato Dela Rosa na hindi siya kumbinsido sa paliwanag ni Lusad sa isyu.
Sa ngayon aniya ay nagsasagawa na rin ng imbestigasyon at audit ang comptroller ng PNP kung bakit hindi naibigay ang subsistence allowance ng SAF.
30 pesos ang subsistence allowance ng SAF sa isang araw o P900 sa isang buwan.
Kung susumahin, umabot na sa 59.8 million pesos ang hindi naibigay na allowance sa mga tauhan ng SAF sa loob ng dalawang taon.
( Lea Ylagan / UNTV Correspondent )
