Mismong si Pangulong Benigno Aquino III ang mangunguna sa simula ng pangangampanya ng mga kandidato ng Liberal Party bukas sa Roxas City, Capiz at Iloilo.

Sa schedule ng Pangulo, alas-onse y’ media ng umaga bukas magsisimula ang programa sa Capiz Gymnasium kasama sina LP standard bearer Mar Roxas at running mate nitong si Camarines Sur Representative Leni Robredo.

Makakasama din ng pangulo ang ilang miyembro ng kaniyang gabinete at si House Speaker Feliciano Belmonte.

Pagkatapos nito, magtutungo ang Pangulo sa Freedom Grandstand sa Iloilo alas-sais ng hapon upang mangampanya kasama ang LP senatorial slate.

Kasabay ng kickoff campaign, pasisinayaan ng Pangulo bukas ang bagong kumpuning Mianay-Duyoc -Calaan-Panitan Road sa Capiz.

Iinspeksiyunin din nito ang bagong tatlong palapag na 18 classroom school building para sa 3,000 magaaral ng Pavia National High School (PNHS) mula sa Philippine Amusement and Gaming Corporation (PAGCOR).

(Jerico Albano / UNTV RadIO Reporter)