METRO MANILA – Binilinan ni Pangulong Rodrigo Duterte si Vaccine Czar at Chief Implementer ng National Task Force kontra Covid-19 na ipagpatuloy ang mga hakbang nito sa procurement ng Covid-19 vaccines ng gobyerno.
Sa gitna ito ng pagdinig ng kongreso sa vaccination program ng pamahalaan at pagkwestyon ng mga kritiko ng administrasyon sa efficacy rate at presyo ng Covid-19 vaccines na likha ng China’s Sinovac Biotech.
“I’m telling now gen. Galvez, yung game plan niya, sundin niya. With or without the investigation, proceed and implement what we plan to do.” ani Pangulong Rodrigo Duterte.
Inihayag naman ng punong ehekutibo na bago pa tumindi ang pandemiya, pinakiusapan na niya si Chinese President Xi Jinping kaugnay ng Covid-19 vaccines at nangako itong hindi kalilimutan ang Pilipinas.
Kamakailan, nangako ang China na magkakaloob ng libreng 500,000 doses ng bakuna sa bansa.
“Long before na pumutok ‘to tumawag na ako kay President Xi jinping. Tapos sabi ko wala kaming resources, we do not know how to make it. Please do not forget the Philippines.” ani Pangulong Rodrigo Duterte.
Pagtitiyak naman ng Presidente, dadaan sa pagrepaso niya at ni Finance Secretary Carlos Dominguez bago maisapinal ang pricing at papeles kaugnay ng Covid-19 vaccine procurement.
Nanindigan naman ang presidente na hindi maaaring ihayag sa publiko ngayon ang presyo ng Sinovac vaccine dahil ito ang nakasaad sa kontrata.
Tinuligsa din ng pangulo ang mga naghihinalang may korupsyon sa vaccine deals ng pamahalaan.
Samantala, muli namang iginiit ng presidente na walang sapilitan sa vaccination program ng pamahalaan at hindi pinipigilan ang mga may kakayanang bumili ng gusto nilang brand ng Covid-19 vaccine.
Tila nagpasaring din ang presidente sa mga ayaw sa Sinovac vaccine at gusto ang bakunang likha ng Pfizer.
Kamakailan, napaulat na may 23 senior citizens na may mga sakit ang nasawi sa Norway matapos na mabakunahan ng Pfizer Covid-19 vaccine.
(Rosalie Coz | UNTV News)
Tags: COVID-19 Vaccine
METRO MANILA – Kinumpirma ng Department of Health (DOH) kamakailan na nakapasok na sa bansa ang subvariant BQ.1, at pinaniniwalaang ito ay mas nakahahawa.
Sa pagsisimula ng Bakunahang Bayan Program ng DOH, muling hinimok ng kagawaran ang mga magulang na pabakunahan na ang kanilang mga anak
Layon ng programa na mas marami pang kabataan edad 5-17 taong gulang ang mabakunahan, lalo’t nangangailangan ang mga ito ng proteksyon ngayong balik face-to-face na ang pasukan.
Ayon kay Dr. Gloria Balboa, Regional Director ng DOH-Metro Manila Center for Health Development, target nilang mabakunahan ang mahigit 529,000 na mga bata edad 5-11 at mahigit 158, 000 na may edad 12-17 sa National Capital Region (NCR).
As of December 5, mahigit 13 milyon na ang naturukan ng first dose sa NCR.
Habang mahigit 12 milyon naman ang fully vaccinated.
Ang Bakunahang Bayan program ng DOH ay sinimulan kahapon (December 5) at magtatapos bukas (December 7) araw ng Miyekules.
(Gladys Toabi | UNTV News)
Tags: BQ.1 Subvariant, COVID-19 Vaccine, DOH
METRO MANILA – Maaari nang makatanggap ng booster dose kontra COVID-19 ang lahat ng mga edad 12 hanggang 17.
Ito ang inanunsyo ng Department of Health (DOH) sa twitter page nito kahapon.
Ginawa ng DOH ang anunsyo isang linggo matapos ipagpaliban ang pagbibigay ng first COVID-19 booster dose para sa non-immunocompromised na mga menor de edad bunsod ng limitasyong itinakda ng Health Technology Assessment Council (HTAC).
Ayon naman kay Health Undersecretary Maria Rosario Vergeire, maaari nang mag-umpisa sa pagkakaloob ng booster dose ang lahat ng implementing units kung may kapasidad na ang mga itong mag-administer ng anti-coronavirus booster shot.
Sa Davao City, sinimulan na nitong Lunes (July 4) ang roll out ng first booster shot sa mga menor de edad.
Paalala ng DOH sa mga magulang o guardian, dalhin ang vaccination card at valid id ng batang babakunahan pati ang dokumentong magpapatunay ng inyong relasyon sa bata.
Para sa karagdagang impormasyon, maaaring makipag-ugnayan sa inyong barangay o sa lokal na pamahalaan.
Tags: Booster, COVID-19 Vaccine
Matapos umpisahan sa ilang mga piling ospital ang pagbabakuna ng booster sa mga immunocompromised na mga 12 to 17 years old nitong Martes, nagsimula na rin ang roll-out ng ilang mga LGU sa National Capital Region noong Miyerkules, June 22, para magbakuna ng booster sa naturang priority group.
Kabilang dito ang lokal na pamahalaan ng San Juan City kung saan aabot sa dalawampung mga batang 12 to 17 years old na immunocompromised ang dumating sa Cardinal Santos Medical Center upang magpabakuna ng booster dose.
Batay sa datos ng San Juan LGU, nasa higit limang libo na mga kabataan sa nasabing age group ang target na mabigyan ng booster dose sa lungsod kasama na ang mga healthy minor.
Ayon kay Mayor Francis Zamora, pinaghahandaan na rin nila ang booster dose vaccination sa healthy minors kung saan ang Greenhills Shopping Center ang gagamiting vaccination site para dito.
“Once we start with our 12 to 17 that are not immunocompromised, I am sure na papayagan kami sa aming regular vaccination sites gaya ng pagpayag naman sa amin noon nung binakunahan namin sila ng first at second dose, handa naman tayo, meron tayong greenhills vaccination sites,” ani Mayor Francis Zamora, San Juan City.
Bukod sa San Juan City, nagsimula na rin kahapon ng booster vaccination sa immunocompromised na 12 to 17 ang syudad ng Maynila. Ang old building ng Ospital ng Maynila ang nagsilbing vaccination site.
Habang ang Mandaluyong City naman, nag-anunsyo na sa kanilang facebook page para iparehistro ng mga magulang ang kanilang mga anak na immunocompromised.
Wala pang sinabi ang Mandaluyong City kung kailan magsisimula ng first booster shot para sa 12 to 17 years old.
Ayon sa ilang mga magulang, nagdesisyon na silang agad pabakunahan ng booster ang kanilang mga anak upang magkaroon ng ibayong proteksyon lalo’t inaasahan na ang muling pagbubukas ng face-to-face classes.
Bukod dito, mainam din anila na ma-booster ang kanilang anak lalo’t may naitatala nanamang pagtaas ng mga kaso ng Covid-19.
Nauna nang sinabi ng National Vaccination Operations Center na maaaring ngayong darating na weekend ay masimulan na rin ang roll-out ng first booster shot para naman sa grupo ng healthy minors kung saan bukod sa mga ospital, maaari na itong isagawa sa iba pang mga vaccination site ng mga LGU.
(JP Nuñez | UNTV News)
Tags: Booster Shot, Covid-19, COVID-19 Vaccine
