Iminungkahi kamakailan ng National Citizens Movement for free Elections (Namfrel) sa Commission on Elections (Comelec) ang obligahin ang mga nais tumakbo sa darating na barangay at Sangguniang Kabataan (SK) elections na magsumite ng resumé.
Ito ay upang makita kung talagang may kakayahan ang isang kandidato na mamuno sa komunidad.
Sang-ayon naman dito ang Department of the Interior and Local Government (DILG). Nilinaw naman ng DILG na hindi sila maglalagay ng bagong requirement kundi nais lamang nila na maging transparent ang mga kandidato.
Obligado lamang masumite ang mga ito ng resumé kapag mayroon ng resolution ang Comelec ukol dito.
Samantala, nagpaalala din ang DILG na hindi naman makakaupo sa puwesto ang mananalong kandidato kapag hindi makakpagsumite ng statement of contribution and expenditure bago ang ika-13 ng Hunyo.
Mahigpit din babantayan ng ahensya ang mga three-termer barangay officials na magtatangka pang tumakbo sa darating na May elections.
Kaugnay nito, inatasan ni DILG OIC Sec. Eduardo Año ng regional offices na magsumite ng listahan ng incumbent punong barangay at sangguniang barangay members na nanilbihan na ng tatlong magkakasunod na termino.
( Lalaine Moreno / UNTV Correspondent )
