Pinagbabaril hanggang sa mapatay ng hindi pa nakikilalang suspek ang pedicab driver na si Mateo Gravillo sa may Laurel Street, Barangay 119, Tondo, Maynila pasado alas onse kagabi.

Susunduin lang sana ng biktima ang kaniyang anak ng mangyari ang insidente. Blangko ang mga kaanak ni Gravillo kung ano ang motibo sa pagpatay sa biktima.

Subalit aminado ang mga ito na dating gumamit ng ipinagbabawal na gamot ang pedicab dirver. Tama ng bala sa ulo ang ikinasawi ni Gravillo.

Kasalukuyan pang iniimbestigahan ng mga pulis ang insidente.

Samantala, arestado ang isang lalaki sa Tondo, Maynila matapos maaktuhang ng mga pulis na nagsusugal.

Pero lumabas sa imbestigasyon na sangkot sa online scam ang suspek na si John Arvee Javillovar.

Dalawampung libong piso ang halagang nakuha ng suspek sa dalawang nabiktima nito.

Maaaring makipag-ugnayan sa Manila Police District Station 1 ang iba pang posibleng nabiktima ng suspek.

Mahaharap sa kasong paglabag sa Republic Act 10175 o ang Cybercrime Prevention Act of 2012 at estafa si Javillovar.

( Asher Cadapan Jr. / UNTV Correspondent )

Tags: Maynila, patay, pedicab driver