Sumuko kagabi sa Philippine National Police (PNP) si Peter Joemel Advincula alyas “Bikoy.” Ito ay kaugnay ng kinakaharap na warrant of arrest sa Legazpi City, Albay bunsod ng kasong paglabag sa Republic Act no. 101-75 o Cybercrime Prevention Act of 2012.
Nag-ugat ito sa reklamo ng negosyanteng si Elizaldy Co, isa sa mga nabanggit sa “Ang Totoong Narcolist” viral video.
Ayon kay Criminal Investigation and Detection Group-NCR Chief Col. Arnold Ibay, dakong alas-7 kagabi nang magtungo sa kanilang tanggapan si Advincula.
Tags: Bikoy, Peter Joemel Advincula
METRO MANILA, Philippines – Malinaw umano na panibagong panggigipit sa oposisyon ang ginawang pagbaliktad ni Peter Joemel Advincula alyas “Bikoy.” Kung saan isinasangkot na ang ilang Senador at Liberal Party na siya umanong nasa likod ng paggawa ng Anti-Duterte videos na pinamagatang “Ang Totoong Narcolist.”
Pinabulaanan ni Senator Antonio Trillanes IV ang mga naging alegasyon na ito ni Bikoy. Maaari aniya na panibagong pakana lamang ito ng administrasyon upang gipitin ang oposisyon.
Ayon pa sa Senador, kumukunsulta na siya sa kaniyang mga abogado kung ano ang maaaring isampang reklamo laban kay Advincula.
Para naman kay Senator Risa Hontiveros, panibagong tangka ito ng administrasyon upang guluhin ang publiko. Produkto aniya ito ng malikot na imahinasyon ng Malakanyang.
Ayon naman kay Liberal Party President Senator Francis Pangilinan, walang ugnayan ang partido kay Bikoy at pawang kasinungalingan lamang ang lahat ng mga paratang na nito.
Maging si Senate Minority Leader Franklin Drilon ay nagsabing walang sabwatan ang LP at si alyas Bikoy upang pabagsakin ang gobyerno kasabay ng panawagan nito sa PNP para sa malalimang imbestigasyon sa isyu.
Ipapaubaya naman ni Senator Panfilo Lacson sa mga otoridad ng imbestigasyon sa panibagong alegasyon ni Advincula. Ayon sa senador, bilang dating Law Enforcement Officer na may karanasan na sa pagkalap ng Intelligence, kailangang magpakita si alyas Bikoy ng mga totoong ebidensya na higit sa kaniyang ikinukuwento.
Si Alyas Bikoy aniya ay may seryosong problema sa kredibilidad na kailangan aniya niyang malutas.
Ayon sa dating PNP Chief, kinakailangan niyang maglabas ng matibay na ebidensya tungkol sa umanoy nangyaring pagpupulong at regular na komunikasyon sa mga taong ngayon ay inaakusahan niya.
Matatandaan na hindi na tinuloy ng komite ni Senator Lacson ang imbestigasyon sa mga unang naging akusasyon ni Alyas Bikoy.
Matapos ibulgar ni Senate President Vicente Sotto III noong ika-8 ng Mayo na dati nang lumapit sa kaniyang opisina si Advincula noong 2016 na isinasangkot sa iligal na droga sina dating Pangulong Benigno Aquino III at ilang miyembro ng gabinete nito. Kung saan naging kaduda duda na sa senador ang nagiging kilos ni Advincula.
“On my part I did due diligence kaya noong 2016, hindi ko pinatulan ito, medyo iniba lang niya kaunti ang script , iniba ang personalidad, ito naman ngayon, so perhaps the best thing again to learn from this lesson, perhaps a good lesson to ibp and religious sector na huwag basta basta ika nga e patol ng patol sa sa mga ito,” pahayag ni Senate President Sotto.
(Nel Maribojoc | UNTV News)
Tags: Bikoy, Sen. Antonio Trillanes IV, Senator Risa Hontiveros
METRO MANILA, Philippines – Walang katotohanan ang video serye “Ang Totoong Narcolist” na nagdadawit sa ilang taong malapit kay Pangulong Rodrigo Duterte sa kalakalan ng iligal na droga sa bansa. Ito ang inamin ni Advincula sa harap ng media sa Kampo Crame matapos sumuko kahapon sa Northern Police District dahil sa kasong Estafa sa Baguio City.
Ayon kay Advincula, fabricated o gawa-gawa lamang ito ng kampo nina Sen. Antonio Trillanes alyas Stella at ilang kandidato ng Otso Diretso maliban kay dating DILG Sec. Mar Roxas.
Bahagi aniya ito ng Project Sodoma na binuo nila ng siyam na buwan para patalsikin si Pangulong Rodrigo Duterte sa pwesto at iupo si Vice President Leni Robredo.
Layon din ng Project Sodoma na bigyan ng tyansa ang Otso Diretso sa katatapos lamang na Midterm Elections.
Aniya, walang ring dragon tattoo na may alpha-numeric code si Senator-elect Bong Go sa likod nito.
At hindi rin totoo na sangkot sa iligal na droga ang ilang pulitiko sa region 5 at sa Misibis Bay ang kanilang opisina.
“Walang katotohanan, lahat lahat yun at yun ay pawang orchestrated lamang ng mga nasa kabilang party which is the Liberal Party, under the handling of Sen. Antonio Trillanes IV. Hindi lang nakausap, ilang beses kaming nagpupulong, nagpa plano upang isakatuparan ang Project Sodoma. Dahil kapag napabagsak si Presidente Duterte ang uupo ay si VP Leni Robledo and the Vice President will appoint from the Senate or House, a certain Congressman to be the Vice President, and Sonny will be the line to become a Vice President, yun ang pinaka plano ng totoong narcolist,” ani Peter Joemel Advincula alyas “Bikoy.”
Sinabi ni Advincula, kilala nya mismo si Sen. Antonio Trillanes IV dahil ipinakilala sya dito ng isang pari na si Fr. Albert Alejo.
Aniya, madalas silang mag-meeting sa Ateneo at sa De La Salle at 500 libong piso ang napagkasunduan nilang ibabayad sa kanya bukod pa sa ipu-pwesto sya sa gobyerno kapag nanalo ang mga kandidato ng Liberal Party.
“Hindi lang si Sen. Trillanes, yung chief security nya ang tawag namin ay Joenel, Jerome ang pakilala nya pero Jeonel, sa mga conversation namin ang code ni Sen. Trillanes sa grupo ay Stella. Nandyan din ang staff ni Sen. Leila de Lima as certain Atty. Pill, si Sen. Hontiveros ilang beses ding pumunta doon, as certain Yolly Villanueva Ong, Vicente Romano, Boom Enriquez at certain businessman Dan Songco, sila ang nasa likod ng produksyon ng “Ang Totoong Narcolist,” ayon kay Peter Joemel Advincula alyas “Bikoy”.
Hindi rin umano niya kilala si Rodel Jayme, ang website administrator na idinadawit sa pagpapakalat ng Bikoy videos.
“opo ex-convict ako galing ako ng new bilibid prison, nakulong ako sa Naga City District jail, galing ako sa Bureau of Corrections pero hindi pa naman ako ganon na level ng tao na napakasama kahit papaano po may konsensya pa rin ako, hindi ko po kayang panindigan yung scripted lang na kwento na ngayong talo na ang kandidato nila, nararamdaman ko na unti-unti na kong nilalaglag dahil wala na kong silbi sa kanila,” ayon kay Peter Joemel Advincula alyas “Bikoy.”
Dagdag ni Advincula, may banta na sa kanyang buhay at sa buhay ng kanyang pamilya kayat humihingi sya ng proteksyon mula sa PNP.
Ayon naman kay PNP Chief Gen. Oscar Albayalde na iba-validate nila ang sinasabi ni Advincula na banta sa kanyang buhay.
“After posting bail, he can go, he is a free man, bailable naman kasi ang kaso nya, if he will ask assistance from us of course as an ordinary citizen we are mandated to assist kahit sino man po sa ating mga kababayan na lalapit sa atin,” ayon kay PNP Chief General Oscar Albayalde.
Humingi ng paumanhin si Advincula sa Administrasyon lalo na sa anak ni Pangulong Duterte na si Kitty.
“Humihingi po ako ng paumanhin lalo na kay Kitty, bata na 14 years old at nadamay sa ganitong pangyayaring ito at kalokohan na ito na isa ako sa nagamit sa mga kalokohan na yun, humihingi ako sa kanya ng paumanhin, pasensya ka na sana balang araw magkita tayo, kung pahihintulutan ng pangulo at personal akong hihingi ng tawad sa kanya sa ikaluluwag ng dibdib ko.” Dagdag ni Peter Joemel Advincula alyas “Bikoy.”
Si Advincula ay isina-ilalim na rin sa booking procedure sa CIDG bago ibalik sa korte sa Baguio City para sa kanyang kasong Estafa.
(Lea Ylagan | UNTV News)
Tags: Bikoy, Peter Joemel Advincula
MALACAÑANG, Philippines – Tumanggi ang Palasyo na magbigay ng assessment sa kredibilidad at ginawang pagbaliktad ni Peter Joemel Advincula alyas “Bikoy”.
Si Advincula ay dating umamin na nasa likod ng “Ang Totoong Narcolist” videos na nagdadawit sa pamilya ni Pangulong Rodrigo Duterte sa kalakalan ng iligal na droga.
Ayon kay Presidential Spokepserson Salvador Panelo, dapat munang magsumite ng ebidensya si Advincula upang patunayan ang kaniyang mga alegasyon lalo na sa mga isinasangkot nitong personalidad.
Ipinauubaya na rin ng Palasyo sa Philippine National Police at Department of Justice ang pagsasampa ng kaso laban kay Advincula kung may nalabag itong batas.
“We will have to wait for “Bikoy” or Advincula to substantiate his charges and after that we’ll see if there are charges to be filed in court then the truth will come out. As I said repeatedly, no matter how you close, you cover, truth will always come out.” Ayon kay Sec. Salvador Panelo.
Tahasan namang itinanggi ng Malacañang ang alegasyon ni opposition Senator Antonio Trillanes na paraan na naman ito ng Duterte administration upang gipitin ang oposisyon.
“In the first place the opposition has been harassing this government, this administration. They are the ones sowing intrigues as we repeatedly said.” Dagdag ni Sec. Salvador Panelo.
Magkakaiba naman ang reaksyon ng mga personalidad na idinawit ni alyas “Bikoy” sa iligal na droga sa “Ang Totoong Narcolist” videos.
Ayon kay dating Davao City Vice-Mayor at ngayo’y Congressman-elect Paolo Duterte, dapat nang imbestigahan ang mga alegasyon ni alyas “Bikoy” lalo’t marami na umanong pangalan ang sangkot sa isyu.
Walang duda rin aniyang si Senator Trillanes nga ang nasa likod ng paglutang ni alyas “Bikoy” gaya ng sinabi niya noon.
Para naman kay Davao City Mayor Sara Duterte-Carpio, isang scam si “Bikoy” na nilikha ng mga kalaban ng Duterte administration.
Kinutya rin ng Presidential daughter ang lider ng grupo dahil inutil aniya ang utak nito.
Si Senator-elect Bong Go naman na unang dinawit ni “Bikoy” sa operasyon ng iligal na droga, hindi na ikinagulat ang pagbaligtad ni “Bikoy”.
Pinatatawad na rin niya si “Bikoy” pero ipinauubaya na niya sa mga otoridad ang pananagutan nito sa batas.
(Rosalie Coz | UNTV News)
Tags: Ang Totoong Narcolist, Bikoy, Malacanñang
